Grete Berget lovar: Ny barnepolitisk melding i 1996

P R E S S E M E L D I N G
Barne- og familiedepartementet

Grete Berget lovar:

Ny barnepolitisk melding i 1996

Statsråd Grete Berget lovar ei eiga stortingsmelding om barnepolitikk i løpet av 1996. Den vil skissere dei mest nødvendige tiltaka som regjeringa vil satse på i sitt framtidige barnepolitiske arbeid.
-Vi må knyte det barnepolitiske arbeidet til både likestilling og familiepolitikk. Her er det ein tydeleg samanheng, understreka Grete Berget under konferansen "Den nordiske barndomen i internasjonalt perspektiv" i Trondheim i dag.

Sidan 1991 har regjeringa ti-dobla pengebruken til barnevernet, auka barnehageutbygginga og 6-års tilbodet i skulane. I tillegg har den skrudd opp farten på utbygginga av skulefritidsordninga i kommunane. Regjeringa har auka overføringane av midlar til kommunane for å styrke arbeidet som er retta mot barn.

Tryggleik i nærmiljøet

Under konferansen i Trondheim i dag peika Grete Berget på kor viktig det er at barna får ein tryggleik i nærmiljøet sitt som dei kan ta med seg vidare.
- Grunnlaget skal leggjast på staden der barn veks opp, men det krev ein nasjonal barnepolitikk. Barnepolitikken er nært knytt til både likestilling- og familiepolitikken. Den kan ikkje sjåast isolert. Mødrenes rolle er endra, og fedrene må ta sin del av omsorgsarbeidet av barn. Utfordringane ligg derfor i å leggje tilrette ordningar i arbeidslivet som gjer det mogleg å kombinere omsorgen for barn med yrkesaktivitet. Derfor har regjeringa slått fast at å utvide tenestetilbodet til barnefamilien kjem føre kontantoverføringane. Ho meiner at summen av tenestetilbodet vil gi barna ein tryggare kvardag.

Krav til foreldre

- Dagens barn må i større grad enn foreldra sine "skape seg sjølv", finne sin eigen identitet - utan klare rollemodellar å støtte seg til. Men barna treng vaksne som har tid, som gir omsorg, støttar dei, rettleiar, set grenser og stimulerer dei i utviklinga deira. Dette set store krav til foreldra som må følgje med i utfordringane. Dei må vere tydelege vaksenmodellar for barna sine. Vi må derfor ta utfordringane i barnepolitikken på alvor, understreka barne- og familieministeren.