Noreg styrkar kampen mot seksuell utnytting av barn
Historisk arkiv
Publisert under: Regjeringen Brundtland III
Utgiver: Barne- og familiedepartementet
Pressemelding | Dato: 27.09.1996 | Sist oppdatert: 21.10.2006
Pressemelding
Nr. 96109
27 september 1996
Noreg styrkar kampen mot seksuell utnytting av barn
- Vi skal lage ein nasjonal handlingsplan mot kommersiell seksuell utnytting av barn, i tillegg vil vi vurdere å få til ein oversikt over barnepornografi, barneprostitusjon og overgriparar, lova statsråd Grete Berget på ei høyring i Nordenutvalet om kommersiell seksuell utnytting av barn i Oslo i dag.
Barne- og familieministeren understreka at oppfølginga av Stockholmkongressen er under planlegging. Ulike tiltak vil verte koordinert samstundes som representantar for frivillige organisasjonar og offentlege eksportorgan vil verte tekne med i arbeidet.
Grete Berget stadfesta overfor sine nordiske kollegaer at Noreg vil følgje opp Erklæringa og Handlingsplanen mot kommersiell seksuell utnytting av barn slik denne vart vedteken i Stockholm i august. Ho peika på at dette vil krevje både nasjonale og lokale planar.
- Dette vil krevje at samtlege land som deltok på konferansen må lage ein nasjonal handlingsplan innan år 2000. Den nasjonale handlingsplanen skal følgjast opp gjennom eit samarbeid mellom frivillige, offentlege og ekspert organ. Det er viktig at desse samarbeider om planlegginga, iverksettinga og evalueringa av tiltaka mot barnepornografi og barneprostitusjon, sa Berget.
I Noreg er det førebelse planar om:
- Eit samarbeid mellom Redd Barna og Barneombodet om barnepornografi på Internett.
- Planar om å støtte Redd Barna i arbeidet deira mot reiselivsbransjen.
- Vil vurdere kva eksisterande spisskompetansemiljø som kan fungere som eit nasjonalt kompetansesenter når det gjeld barneprostitusjon.