Pressemelding

Kommunal- og arbeidsdepartementet

Oslo, 25.08.95

Nye arbeidsmiljøforskrifter:

Gravide skal vernes mot forplantningsskadar

Det er fastsett forskrift om forplantningsskadar og arbeidsmiljø. Forskrifta tar sikte på å verne arbeidstakarane mot risiko for forplantningsskadar som følgje av påverknader frå arbeidsmiljøet. Forskrifta inneber samtidig ei iverksetjing av eit EU-direktiv på området.

Arbeidsgjevar vert pålagt ei plikt til å vurdere om påverknader frå arbeidsmiljøet kan gje forplantningsskadar hos arbeidstakarane. Arbeidsgjevaren skal syte for å unngå at arbeidstakarane vert utsette for forplantningsskadelege påverknad og setje i verk nødvendige verne- og tryggingstiltak. Gravide og ammande skal omplasserast til anna arbeid dersom påverknader frå arbeidsmiljøet kan gje risiko for forplantningsskadar. Gravide arbeidstakarar skal om nødvendig takast ut av arbeid. - Lønskompensasjon vil bli gjeve i form av svangerskapspengar, seier kommunal- og arbeidsminister Gunnar Berge.

Ikkje-gravide kvinner og menn i forplantningsdyktig alder skal også få tilbod om omplassering dersom arbeidsmiljøet kan gje risiko for forplantningsskadar. Vilkåret for omplassering er i desse tilfella at omplasseringa er nødvendig og praktisk gjennomførleg.