Pressemelding

Kommunal- og arbeidsdepartementet

Oslo, 04.10.95

STATSBUDSJETTET 1996

62.5 millioner kroner til grenseregionalt samarbeid

Kommunal- og arbeidsdepartementet går inn med 62,5 millioner kroner i 1996 til regionalt samarbeid over landegrensene. Hovudtyngda av midla går til grenseregionalt samarbeid med Sverige, Finland og Russland. Ein mindre del går til prosjektsamarbeid mellom norske fylker og regionar i andre delar av Europa. Samarbeidet med nabolanda skjer innanfor ramma av EU sitt INTERREG-program. Sverige og Finland får EU-middel til utvikling av grenseregionane gjennom dette programmet, og har invitert Noreg til å bli med. Regjeringa sitt mål for norsk deltaking i INTERREG er å betre vilkåra for næringsutvikling i regionane som vert omfatta av INTERREG.

• INTERREG vil bidra til å utlikne konkurranseulemper for norsk næringsliv, når Sverige og Finland set i gong større EU-finansierte strukturfondsprogram for utvikling av næringsliv og sysselsetting. INTERREG vil òg bidra til å styrke det nordiske samarbeidet og Barentssamarbeidet, seier kommunal- og arbeidsminister Gunnar Berge.

Noreg si deltaking vil fullt ut bli finansiert med norske middel. EU sine middel vil gå til medlemslanda. For å kunna møte innsatsen på svensk og finsk side, vil det samla vera behov for om lag 115 millioner kroner per år frå norsk side i perioden 1996-99. Kommunal- og arbeidsdepartementet vil dekke om lag 50 prosent av finansieringsbehovet. Det resterande vil bli dekka regionalt og lokalt over eksisterande rammer, til dømes statlege, fylkeskommunale, kommunale og private middel, eller middel fra Nordisk ministerråd.

Noreg vil delta i seks INTERREG-regionar som omfattar heile den norske grensa mot Sverige, Finland og Russland. Fem av regionane leverte i august inn utkast til INTERREG-program som nå er godkjent av regjeringane i Noreg, Sverige og Finland og levert EU-kommisjonen. Programmet for Barentsregionen vil ta noko lenger tid å utarbeide. Dei nordiske INTERREG-programma vil iverksettast i perioden 1996-99. Spekteret av tiltak det er gjort framlegg om er stort, og omfattar blant anna støtte til nyetablerarar og små- og mellomstore bedrifter, bygdeutviklingstiltak, turismeprogram, opplæring og utdanning, forsking og utvikling og kultur- og miljøtiltak.