Betre målretting av arbeidsmarknadstiltaket. Tilskot til bedriftsintern opplæring (BIO)

Pressemelding

Oslo, 17.09.96

Framlegg til endringar på høyring:

Betre målretting av arbeidsmarknadstiltaket.

Tilskot til bedriftsintern opplæring (BIO)

Kommunal- og arbeidsdepartementet gjer framlegg om enkelte endringar under arbeidsmarknadstiltaket Tilskot til bedriftsintern opplæring (BIO). - Framlegga vil bidra til å motverke utstøyting frå arbeidslivet og bidra til høy yrkesdeltaking, seier kommunal- og arbeidsminister Gunnar Berge. Dette byggjer opp under måla i arbeidsmarknadspolitikken.

• Bedriftsintern opplæring vil etter framlegget til endringar bli meir retta mot opplæring av tilsette med svak utdanningsbakgrunn i samband med omstillingar. Dette er ei gruppe arbeidstakarar som ofte står i fare for å falle ut av arbeidslivet når det skjer endringar i produksjonen eller produksjonsmetodar på arbeidsplassen, seier Berge.

Departementet foreslår at opplæring ved rekruttering av arbeidsledige, blir ført vidare som i dag.

Tilskotssatsane under ordninga blir enda. Lønstilskotet på maksimalt 50 prosent blir føreslått redusert til maksimalt 25 prosent av lønskostnadene. Denne endringa vil gje ei meir effektiv utnytting av ressursane som blir løyvd til BIO. Driftstilskotet blir og føreslått endra. I høyringa har det vore drøfta å føre vidare den ordninga som gjeld i dag, men med ein noko lågare tilskotssats. Ein har og drøfta ei ordning med faste tilskotssatsar differensiert etter fagområde.

• Sjølv om ordninga med tilskot til bedriftsintern opplæring er avgrensa i omfang samanlikna med fleire andre arbeidsmarknadstiltak, er den viktig for tilsette med svak utdanning som treng opplæring ved omstillingar, og for arbeidsledige som kjem inn i ordinære arbeidsplassar ved hjelp av denne ordninga, seier Gunnar Berge.

Høyringsfristen er 11. desember 1996.

I 1995 var det i gjennomsnitt i underkant av 1000 plassar under BIO, og det vart brukt 118 millionar kroner.