Pressemelding

Kommunal- og arbeidsdepartementet

Oslo, 22.08.96

Ni millionar kroner til kaibygging i Gulen og Masfjorden

Kommunal- og arbeidsdepartementet har gjeve tilsegn om tilskot på inntil 9 millionar kroner til bygging av kai i Sløvågen på nordsida av Fensfjorden. Kostnaden for denne delen på prosjektet er oppgjeve til om lag 27,6 millionar kroner.

• Kommunane Gulen og Masfjorden har satsa på nye arbeidsplassar. Dei har lagt til rette for aktivitetar som har tilknyting til oljeverksemda i regionen og oljeverksemda i Nordsjøen, seier Gunnar Berge. Planleggingsarbeidet har gått på å leggje til rette eit større utbyggingsområde på om lag 465 dekar i Sløvågen. Planane blir gjennomførde i eit samarbeid mellom dei to kommunane. I det første byggjetrinnet skal det etter planen byggjast to kaier, og det skal førast fram vatn og avløp til kai-områda.

Då Kommunal- og arbeidsdepartementet også i fjor gav tilsegn på inntil ni millionar kroner, er det etter dagens tilsegn gjeve tilsegn på 18 millionar kroner til første byggjetrinn av Sløvågområdet. Det totale kostnadsoverslaget for første byggjetrinn er etter anbod rekna til om lag 45,6 millionar kroner.

• Departementet har ved behandlinga av denne saka lagt stor vekt på den verdien prosjektet har for kommunane Gulen og Masfjorden når det gjeld framtidig næringsutvikling og sysselsetjinga, seier Berge.