P R E S S E M E L D I N G
Kirke-, utdannings- og forskningsdepartementet

Nr. 090-95, 20. oktober 1995

Auka statstilskot til private skolar

Regjeringa gjer framlegg om å auke tilskotet til private vidaregåande skolar med om lag 30 millionar kroner på årsbasis. I tillegg vert det lagt inn kompensasjon for forventa prisstiging frå 1995 til 1996. Det vert og gjort framlegg om at auken i tilskotssatsane skal gjelde frå 1. august 1995. Dette er dei viktigaste punkta i ei tilleggsmelding til budsjettproposisjonen, St.prp. nr 1 Tillegg nr. 1 (1995-96) som passerte statsråd fredag.

Kyrkje-, utdannings- og forskingsdepartementet har gjennomført ei kostnadsundersøking for å jamføre kostnadene i dei offentlege skolane med tilskota til private skolar. Dette gjeld i dei skolane som etter paragraf 26 i Privatskolelova får utrekna statstilskotet på grunnlag av dei gjennomsnittlege utgiftene i offentlege skolar (tilskotsregel nr. 4, 7 og 9). Undersøkinga viser at kostnadene i dei offentlege vidaregåande skolane er høgre enn det som er lagt til grunn for gjeldande tilskotssatsar til dei private vidaregåande skolane, og på grunnlag av dette gjer Regjeringa framlegg om ein auke av tilskotet til denne kategorien. Regjeringa gjer samstundes framlegg om at berekninga av tilskotsgrunnlaget for skolane vert lagt om.

For dei private grunnskolane viser ikkje kostnadsundersøkinga nokon ubalanse mellom det samla tilskotsnivået og kostnader i dei offentlige skolane. Det vert gjort framlegg om at satsane for desse skolane og andre skolar som får statstilskot etter Privatskolelova får ei justering for forventa prisstiging frå 1995 til 1996.

Regjeringa tek sikte på å oppnemne eit utval for å gjennomgå tilskotssystemet for private skolar.