Pressemelding

Nr. 077-96, Dato 4. oktober

2 MILLIARDAR TIL GRUNNSKULEN

Kyrkje-, utdannings- og forskingsdepartementet gjer framlegg om å løyve nærare 2 milliardar kroner til grunnskulen. Dette er ein auke på 30,4 prosent i høve til 1996. Den store auken skuldast i hovudsak kompensasjon til kommunane når det gjeld Reform 97.

På Kommunal- og arbeidsdepartementet (KAD) sitt budsjett blir det lagt inn om lag 740 millionar kroner i rammetilskotet til kommunane som kompensasjon for driftskostnadene (som t d undervisningsrelaterte kostnader, skyss, kommunal eigendel for skulefritidsplassar og lærebøker) i samband med Reform 97.

Kommunane sine utgifter til investeringar til seksåringar blir kompensert gjennom øyremerkte tilskot over KUF sitt budsjett. Statstilskot til nye skulefritidsplassar blir og løyvt gjennom øyremerkte tilskot.

Hovudmoment for grunnskuledelen på KUF sitt område:

• Kommunane sine samla investeringsbehov er no utrekna til 4 781 millionar 1997-kroner. Investeringsbehovet har auka som følgje av Stortinget si handsaming av St prp nr 39 (1995-96). Kompensasjonen for 1997 som gjeld investeringar er utrekna til om lag 196 millionar kroner, basert på ei rente på 5,5 prosent og avdragstid på 20 år for bygg og 10 år for utstyr.
• Budsjettframlegget gir rom for skulefritidsplassar til 36 000 seksåringar og 70 000 7-9-åringar hausten 1997. I tillegg er det lagt inn midlar i inntektssystemet til kompensasjon for auka kommunale eigendelar i samband med skulefritidsplassar til seksåringane som følgje av reforma.
• I budsjettframlegget er det lagt opp til at 50 millionar kroner til kompetanseutvikling knytta til innføring av det nye lærerplanverket, skal førast vidare. Av omsyn til planlegging i kommunane vert det gjort framlegg om ei tilsegnsfullmakt på 50 millionar kroner til kompetanseutvikling, utover løyvinga for 1997.

I tillegg til kompensasjon for reforma omfattar løyvinga til grunnskulen øyremerkte tilskot til m a skulefritidsordningar, musikkskular, leirskular,verkemiddeltiltak i Nord-Noreg og tiltak for samiske elevar. Løyvinga dekkjer òg arbeid i samband med eksamen og forskings- og utviklingsarbeid i grunnskulesektoren.

Kompensasjon for Reform 97 (gjeld løyvingar både på KUF og KAD sitt budsjett):

Den årlege kompensasjonen til kommunesektoren for meirutgifter til drift og investeringar som følgje av Reform 97 er utrekna til mellom 2 285 og 2 635 millionar kroner, avhengig av resultatet av forhandlingane om løns- og arbeidsvilkår for det pedagogiske personalet. I tillegg kjem kompensasjon for meirutgifter til lærebøker for 2. - 10. årstrinn.

Stortinget har vedtatt at reforma skal setjast i verk frå og med hausten 1997. Kompensasjonen for drift og investeringar til kommunesektoren for 1997 vil derfor gjelde frå august 1997 og er utrekna til mellom 1 004 og 1 150 millionar kroner.

Pressekontaktar:

Ekspedisjonssjef Hanna Marit Jahr, tlf. a 22 24 75 00, p 69 25 49 51
Avdelingsdirektør Tove Brekke, tlf. a 22 24 75 12, p 66 99 32 65
Avdelingsdirektør Johan Raaum, tlf. a 22 24 75 41 p 22 38 37 77 (Reform 97)