P R E S S E M E L D I N G
Kirke-, utdannings- og forskningsdepartementet

Informasjonssjef Terje Flesjø, telefon 22 24 74 09, privat 69 28 68 70
Informasjonskonsulent Jon Aarekol, telefon 22 24 74 17, privat 22 22 44 84

Nr. 037-96, 31. mai 1996

Innstilling frå planleggingsgruppe:

Film- og fjernsynsutdanninga i Lillehammer

Ei planleggingsgruppe som har sett på innhaldet i ei treårig utdanning innan film- og fjernsynsproduksjon ved Høgskolen i Lillehammer overleverte fredag si innstilling til kyrkje-, utdannings- og forskingsminister Reidar Sandal. Leiar i gruppa har vore rektor Kjell Grede ved Dramatiske Institutet i Stockholm. Det var i juni 1991 at Stortinget vedtok å leggje film- og fjernsynsutdanninga til Lillehammer.

Film- og fjernsynsutdanninga ved Høgskolen i Lillehammer omfattar 6 linjer: Regi, foto, klipp, produksjon, lyd og manus. Utvalet argumenterer i innstillinga med at det bør opprettast ei dokumentarfilmutdanning i tillegg til dei seks utdanningane.

Arbeidsgruppa gjer framlegg om at det bør vere 4-6 studentar på kvar linje. Opptaket bør skje annakvart år, og all undervisning skal vere obligatorisk. Det bør ikkje fastsetjast noko nedre aldersgrense for opptak, sjølv om studiet krev at studentane er modne og har allmennutdanning eller praktisk røynsle. Skolen bør vidare ha eit visst høve til å ta inn hospitantar.

Arbeidsgruppa gjer framlegg om at etter- og vidareutdanning skal skje i samarbeid med Statens studiesenter for film i Oslo.

Skolens innhald skal basere seg på ei rekkje grunnleggjande tema som idéarbeid, skodespelaren, det filmiske språket, forteljinga, teknikk og økonomi, det lange formatet, stil og genre. Arbeidsgruppa poengterer at for å halde undervisninga på eit høgt nivå bør talet på produksjonar i løpet av utdanninga kunne samanliknast med filmskolane i Sverige og Danmark. Utdanninga bør delast i 1,5 år med "skole" og 1,5 år med individualisering.

Planleggingsgruppa poengterer at film og fjernsynsutdanninga ved Høgskolen i Lillehammer vert gitt dei same vilkåra som dei andre kunstfaglege utdanningane i Noreg. Utdanninga vil vere i nettverk med desse skolane, og med den regionale høgskolesektoren. Gruppa ser det som viktig at film- og fjernsynsutdanninga her i landet får ein synleg identitet i samsvar med andre utdanninga i utlandet. Det vert difor gjort framlegg om at utdanninga får høve til å nytte namnet Den norske filmskolen, i tillegg til namnet Institutt for film- og fjernsynsutdanning ved Høgskolen i Lillehammer.

Utdanninga får eit styre som har representantar frå fagmiljøa.

Spørsmål kan rettast til:

Rektor Svein Oddvar Haaland ved Høgskolen i Lillehammer, tlf. 61 28 83 90