P R E S S E M E L D I N G
Landbruksdepartementet

26. juli 1995

Betre matvarekvalitet og dyre- og plantehelse

Departementet legg vekt på god matvarekvalitet og god dyre- og plantehelse. Arbeidet med Konkurransestrategiar for norsk mat vil halde fram på same nivå som i 1995 med ei foreslått løyving på 66 millionar kroner. Arbeidet inneber mellom anna kvalitets- og marknadsfremjande tiltak med vekt på både heime- og eksportmarknaden. Målet er å styrkje konkurransekrafta i primærproduksjonen og foredlingsindustrien.

Kontroll- og forvaltningssystema innafor næringsmiddelområdet og det veterinære og plantesanitære området vil bli trappa monaleg opp for å sikre forbrukarane norskproduserte og importerte matvarer av høg kvalitet og som er trygge for helsa. God helse på planter og dyr kan også gi norsk landbruk ein viktig konkurranseføremon.

Institusjonar som arbeider med plante- og dyrehelse og matvarekvalitet er foreslått styrkja. Det er framlegg om å auke løyvinga til drifta av den veterinære felttenesta med vel 7,5 prosent til 130,9 millionar kroner. Arbeidet med kontroll og dyrevern vil bli trappa opp. Programmet for overvaking av salmonellabakterier i alle ledd av produksjonen vil bli vidareført. Driftsløyvinga til Statens veterinære laboratorier vil auke med fem prosent til 70,5 millionar kroner. Statens næringsmiddeltilsyn vil få auka sitt driftsbudsjett med 4,5 prosent til 79,3 millionar kroner. Statens landbrukstilsyn vil få auka løyving til drift med nær ti prosent til 51,9 millionar kroner.

---

Lagt inn 17 oktober 1995 av Statens forvaltningstjeneste, ODIN-redaksjonen