P R E S S E M E L D I N G
Landbruksdepartementet

26. juli 1995

Forskning og utdanning

Det er framlegg om å løyve til saman 699,7 millionar kroner til forskning. Dette er ein auke på knapt to prosent. Løyvinga til Norges forskningsråd er på 133,8 millionar kroner, som er ein auke på 16 prosent. Auken rettar seg mot prioriterte områder innan Forskningsrådets aktivitet. Det vil bli sett i gang eit breitt forskningsprogram om mellom anna levekår og inntekter for folk i landbruket, fortrinnsanalysar av produksjonar, og av makttilhøva innan landbrukssektoren.

Forskning og utvikling innan dyrehelse, epidemiologi og risikoanalyse skal framleis halde eit høgt nivå. Satsinga på miljøretta næringsutvikling og kunnskapstiltak innan skog og skogindustri vil bli trappa opp.

Høgare utdanning vil bli prioritert gjennom høgt studentopptak ved Norges veterinærhøgskole og Norges landbrukshøgskole. Det vil bli oppretta åtte nye studieplassar ved Norges veterinærhøgskole, slik at det i 1996 blir teke opp 56 studentar.

Talet på studentar ved Norges landbrukshøgskole vil auke med 160 i 1996 grunna auka studenttal kvart år dei seinare åra. Som følgje av det høge studenttalet vil det bli oppretta fem faste og fire mellombels stillingsheimlar.

---

Lagt inn 17 oktober 1995 av Statens forvaltningstjeneste, ODIN-redaksjonen