P R E S S E M E L D I N G
Landbruksdepartementet

26. juli 1995

Skogbruk

Det er framlegg om ei samla løyving til skogbruket på 238,8 millionar kroner. Av dette er 89 millionar kroner foreslått nytta til langsiktige investeringar og næringstiltak, og vel 14 millionar til ressurs- og miljøtiltak i skogbruket. I tillegg er det avsett 110 millionar kroner over Landbrukets utviklingsfond til skogbruksføremål og om lag 25 millionar kroner som vil gå inn i dei fylkesvise bygdeutviklingsfonda. Det vil også bli nytta forskningsmidlar til produktutvikling med sikte på betre og auka bruk av trevirke, og dermed auka verdiskaping.

I tillegg til statlege tilskott, står ordninga med skogavgift sentralt i finansieringa av langsiktige investeringar i skogen. Skogavgift er midlar som brukaren kan avsetje ved hogst og oppnå skattefordel for når midlane blir nytta til skogkultur og skogsvegar.

Føremålet med løyvingane er å leggje tilhøva til rette for ein aktiv bruk av skogressursane på kort og lang sikt, samstundes som miljøverdiane i skogen blir tekne vare på og utvikla vidare. Målet er auka sysselsetjing og verdiskaping i skogbruket og treindustrien, spesielt i distrikta.

Dei samla løyvingane til skogbrukstiltak er mindre enn i 1995. Nedgangen er ein lekk i Regjeringa sitt arbeid med å redusere næringsoverføringane.

Det er framlegg om å overføre Statens skogfrøverk på Hamar vederlagsfritt til Det norske skogselskap frå 1.1.96. Dermed vil vi oppnå ei effektiv kopling mellom frø- og planteforsyninga her i landet. Dei ti tilsette ved Skogfrøverket skal få tilbod om arbeid i den nye verksemda.

---

Lagt inn 17 oktober 1995 av Statens forvaltningstjeneste, ODIN-redaksjonen