PRESSEMELDING
Miljøverndepartementet

26. januar 1996

Kommunane sterkare inn i forvaltninga av lakse- og innlandsfisk

Miljøverndepartementet har overført formell mynde og oppgåver innan forvaltninga av lakse- og innlandsfisk til kommunane. I samsvar med den nye lova om lakse- og innlandsfisk har kommunane ansvar for å setja i gang arbeidet med å organisera og få i gang driftsplanar for vassdrag. Lokalmiljøet vil få større ansvar for og betre høve til å forvalte og nytte fiskeressursane på ein meir tenleg måte. Gjenom aktiv lokal innsats vil ein i større grad enn før kunne leggja tilrette for utnytting. Kommunane får det formelle ansvar for å sjå til at naudsynt tilrette-legging for ålmentas utnytting av fiskeressursane blir sett i gang. Departementet vil likevel peike på at det primære ansvar for organisering og kultivering av vassdraga kviler på dei som har rettane.