P R E S S E M E L D I N G
Utenriksdepartementet

4. oktober 1995

STATSBUDSJETTET 1996

EFTA, EFTA-domstolen og overvåkningsorganet (ESA)

Det norske tilskotet til EFTA-organa i 1996 er på 313 mill. kroner. Tilskotet er fordelt på EFTA-sekretariatet, Domstolen, Overvakingsorganet (ESA) og Låne- og tilskotsordninga. Budsjettet for EFTA-sekretariatet i Geneve og Brussel i 1996 er på 36 mill. kroner, budsjettet til Domstolen er på 30 mill. kroner, budsjettet til Overvakingsorganet 54 mill. kroner og til Låne- og tilskotsordninga på 193 mill. kroner. Alle EFTA-organa har i 1995 gjennomgått omfattande administrative endringar på grunn av at Austerrike, Finland og Sverige har gått ut av organisasjonen frå 1. januar 1995.

EFTA-sekretariatet

Budsjetttilskotet er på same nivå som tidlegare år.

EFTA står andsynes store utfordringar i 1996. Hovudoppgåva er å sikra ei effektiv gjennomføring av EØS-avtalen. Avtalen gjev Noreg høve til å delta i den indre marknaden i EU med fri rørsle av varer, personar, tenester, kapital og samarbeid på område som forbrukarpolitikk, sosial- og arbeidslivsspørsmål - under dette også konsernfagleg samarbeid - miljøvern, og forskingssamarbeid. Avtalen sikrar like konkurransevilkår og harmonisering av regelverk.

Overvakingsorganet (ESA)

Hovudoppgåva til Overvakingsorganet er å føra tilsyn med at EFTA-landa gjennomfører og gjer bruk av reglane i EØS-avtalen fullt ut i samsvar med skyldnadene i avtalen.

I 1994-95 vurderte ESA generelt korleis dei 1600 rettsaktene i EØS vart gjennomførde i den nasjonale retten. ESA har eit særleg ansvar for å sjå til at regelverket vert oppfølgd innanfor områda offentleg innkjøp, statsstønad og konkurranse. Det norske budsjettilskotet vil i perioden 1995 - 1996 auka frå 18 mill. kroner til 54 mill. kroner.

Låne- og tilskotsordninga

Låne- og tilskotsordninga under EØS-avtalen skal gje finansieringsstønad til utvikling og strukturtilpassing i Hellas, Irland, Portugal og nærare spesifiserte deler av Spania. Det vil verta gjeve prioritet til investeringar i sektorane miljø, utdanning og transport.

Noreg og dei andre bidragsytarane skal i perioden 1994-1998 gje tilskot på 500 mill. ECU og subsidiera lån på 1500 mill. ECU (rentene vert subsidierte med 2 pst.) Det norske budsjettet i 1994 og 1995 var båe åra på 160 mill. kroner. Budsjettet vil i 1996 auka til 193 mill. kroner. Det norske bidraget over heile femårsperioden vil verta på omlag 750 mill. kroner.

Rentesubsidiane går så langt opp i ein sum på totalt kring 300 mill. kroner. Fordelinga på sektorar er på 50 pst. til miljø og 50 pst. til transport. Spania har motteke 55 pst. og Portugal 43 pst. av subsidiane.

Tilskota går så langt opp i totalt kring 100 mill. ECU. Fordelinga på sektorar er omlag 47 pst. til utdanning, 39 pst. til transport og 13 pst. til miljøprosjekt. Spania har motteke 50 pst., Portugal 26 pst. og Hellas 23 pst. av tilskota.

---

Lagt inn 4 oktober 1995 av Statens forvaltningstjeneste, ODIN-redaksjonen