Kommunar frå heile landet får tilskot til ferie- og fritidsaktivitetar for barn

- Barn og unge har hatt ein veldig annleis vår i år, med stengte skular og barnehagar og ingen fritidsaktivitetar på mange veker. For mange har det vore vanskeleg. Derfor er eg ekstra glad for at vi tildeler desse pengane i år. Dei skal bidra til å gi barn og unge over heile landet gode opplevingar saman med andre, seier barne- og familieminister Kjell Ingolf Ropstad.

Nasjonal tilskotsordning for å inkludere barn og unge er i år på rundt 310 millionar kroner. Tidlegare har frivillige organisasjonar som har søkt direkte til Bufdir, inkludert Røde Kors, Blå Kors og Kirkens Bymisjon fått tildelt over 150 millionar kroner. I denne runda går pengane til enkelttiltak som søker gjennom kommunen. Pengane går til alt frå gratis utlån av sportsutstyr og ferieturar til arbeidstrening i kafé, til festivalar og bandleirar.

Sjå oversikt over tildelingane på Bufdir sine nettsider.

- Fritidsaktivitetar er ein stadig viktigare del av det sosiale livet til barn og unge. På fritida lærer barn nye ting, finn stader å høyre til og vennskap som kan vare livet ut. Derfor er det så viktig at det er mogleg for alle å delta, uavhengig av kor mykje foreldra tener eller kva bakgrunn dei har, seier statsråden.

Regjeringa har og foreslått å auke løyvingane i denne tilskotsordninga med 53 millionar kroner i RNB. Dette er ein del av forslaget om tiltakspakke for sårbare barn og unge. Midlane skal gå til tiltak i regi av ulike organisasjonar som gir eit tilbod om ferie- og fritidsaktivitetar til sårbare barn og unge.