Solid vekst i antal psykologar i kommunane

- Regjeringa har prioritert å styrke psykologkompetansen i kommunane. Dei aller fleste som får psykiske helseproblem, får det i ungdomsåra. Det er heilt avgjerande at vi klarer å jobbe med førebyggande, kome tidleg inn når nokon har det vanskeleg og ha eit bra lågterskeltilbod, seier helseminister Bent Høie.

Frå 130 til 590

I alt 350 kommunar og bydelar har fått tilskot til 591 psykologstillingar i 2019. 48 nye kommunar har fått tilskot i år. 14 av desse ligg i Nordland, og 11 i Troms. Ein rapport frå SINTEF syner at tilskotsordninga til psykologar i kommunane har vore avgjerande for den store auken i antal psykologstillingar i kommunane. I 2013 var talet kun 130.

- Når folk får hjelp tidleg, er det med på å bidra til å redusere sosiale helseskilnader som varer livet ut, påpeikar Høie.

Frå 1. januar 2020 er det eit krav at alle kommunar skal ha psykologkompetanse. I år er difor siste året kommunane kan motta tilskot frå staten til å rekrutterer psykolog. Deretter vil midlane gå inn i ramma til kommunane.

Behov for kompetansen

- Det er behov for kompetansen til psykologane i kommunen. Vi har difor heldt fram å styrke tilskotsordninga, slik at alle kommunar skal kunne rekruttere psykolog innan lovkravet trer i kraft. Det er viktig at kommunar som endå ikkje har psykolog nyttar tilskotsordninga, seier Høie.I budsjettet for 2019 auka regjeringa løyvinga til psykologar i kommunane med 50 millionar kroner, tilsvarande om lag 120 nye årsverk. Samla vert det løyva 205 millionar kroner i år. Det gjenstår 32,6 millionar kroner som no vert lyst ut med søknadsfrist i september.

Fylkesvis oversikt over antal kommunar som tek imot tilskot per april 2019:

 

Fylke	Totalt antal kommunar/bydelar i fylket	Kommunar/bydelar i fylket som tek imot tilskot
Aust- og Vest-Agder	30	25
Buskerud	21	17
Finnmark	19	13
Hedmark	22	21
Hordaland	33	25
Møre og Romsdal	35	27
Nordland	44	40
Oppland	26	26
Oslo	17	17
Akershus	22	22
Rogaland	26	21
Sogn og Fjordane	26	17
Telemark	18	18
Troms	24	23
Trøndelag	52	33
Vestfold	9	9
Østfold	18	15