Erstatning for tap av sau og lam til rovvilt held fram på historisk lågt nivå

- At tapstalla til rovvilt held fram på historisk lågt nivå viser at rovviltpolitikken i Noreg fungerar særs godt. Det er gode nyheiter både for beitenæringa og rovdyra, seier den nye klima- og miljøministeren, Sveinung Rotevatn (V).

Forvaltninga arbeider kontinuerleg for å redusere tap av beitedyr, mellom anna gjennom førebyggjande tiltak og ved å gjere skadefelling meir effektivt. I tillegg er soneforvaltninga, med område prioritert til beitedyr og rovdyr, eit viktig verkemedel i forvaltninga av rovdyr.

Tap til ulv rekordlågt

Tapa til ulv var i fjor dei lågaste på ti år, med 1 455 sauer og lam erstatta.

Av dei område kor det vart registrert tap så var det delar av Trøndelag og Nord-Østerdalen som hadde flest dyr tapt til ulv.

- Forvaltninga av ulven må balansere dei ulike interessene og eg er difor glad for at tala frå Miljødirektoratet syner at tap av sau og lam til ulv i 2019 var det lågaste på ti år, seier klima- og miljøminister Sveinung Rotevatn.

Høge tap i nokre område

Det er geografiske skilnader i fordelinga av rovvilttap. Trøndelag er det fylket med størst tap av sau og lam til rovvilt. Meir enn halvparten av erstatninga for tap til bjørn, vart utbetalt i Trøndelag. På trass av høge tap i einskilde område, er det samla talet sau erstatta som tatt av bjørn det lågaste sidan 2014. Jerven er det dyret som voldar flest skader på sau og lam.

- Eg har forståing for at det har vore utfordrande med rovvilt i einskilde område av landet, mellom anna i Trøndelag. Forvaltninga jobbar kontinuerleg for å redusere tap av beitedyr, og i fjor vart budsjetta auka med ti millionar kroner til førebyggjande og konfliktdempande tiltak, seier klima- og miljøminister Sveinung Rotevatn.

Du kan lese meir her.