Satsing på nullutslepp for store skip

Utsleppa frå innanriks sjøfart og fiske skal halverast innan 2030. Regjeringa ønsker at Noreg skal ta ein leiande posisjon innan grøn skipsfart. Norske bedrifter har potensial til å bli verdsleiande innan utviklinga av låg- og nullutsleppsløysingar.

Regjeringa lanserer derfor den nye satsinga MaritimeZero 2050. Ei satsing som spesielt rettar seg mot utviklinga av betre og gjennomførbare nullutsleppsløysingar for store skip som går over lange strekningar.

- Den norske elferje-suksessen har vist oss at det er mogleg å både kutte utslepp og skape nye arbeidsplassar med fokusert innsats. Men målet vårt er å innføre null- og lågutsleppsteknologi i alle fartøyskategoriar. Derfor må vi nå ta steget og utvide satsinga vår til óg å gjelde store skip med store utslepp, seier klima- og miljøminister Sveinung Rotevatn (V).

Regjeringa foreslår i sitt budsjett å øyremerke 40 millionar kroner til utvikling av nullutsleppsteknologi for større skip i nasjonal og internasjonal fart. Satsinga skal administrerast under MAROFF-programmet i Forskingsrådet (Maritim virksomhet og offshoreoperasjoner).

- Etterspurnaden etter gode klima- og miljøvenlege fraktmoglegheiter til sjøs aukar, og Noreg har allereie komme langt i å teste lågutsleppsløysingar for dette segmentet. Vi treng likevel meir forsking og innovasjon. Eg har tru på at Noreg kan bli leiande på slik teknologi i framtida, seier næringsminister Iselin Nybø (V).

40 millionar til hurtigbåtar

Regjeringa vil fortsette å støtte fylkeskommunane slik at det er mogleg å prioritere låg- og nullutsleppsteknologi i nye anbod på ferjer og hurtigbåtar. Regjeringa foreslår å vidareføre Hurtigbåtordninga i Miljødirektoratet med ei ramme for nye tilsegner på 40 millionar kroner i 2022. Med dette har regjeringa løyvd 241 millionar kroner til prosjektar for innfasing av låg- og nullutslepps hurtigbåtar i fylkeskommunane sidan 2019.

Regjeringa held fram med ein målretta innsats på grøn skipsfart med 80 millionar kroner i 2022.

Vidareførar låneordninga for skip i nærskipsfart og fiskefartøy

I 2020 oppretta regjeringa ei låneordning for skip i nærskipsfart og fiskefartøy. Ordninga skal bidra til grøn omstilling i næringa, og reiarlag kan få lån til investeringar i låg- og nullutsleppsløysningar. Så langt har det blitt gitt tilsegn på 200 millionar kroner i lån under ordninga. Regjeringa foreslår å vidareføre låneordninga i 2022.