Utvalde kulturlandskap i jordbruket - Leka i Trøndelag

Skei ligg nordaust på Leka i Trøndelag med gardstun, innmark, naustområde, gamle torvmyrer og utmark i Skeisnesset. Bøndene på Skei har storfe og utegangarsau. Areala blir for det meste brukt til grasproduksjon og beite, men her er og litt korn og potet. Skeisnesset er i hovudsak kystlynghei, men her er og artsrike slåttenger, rik myrer, strandenger og naturbeitemark.  Her finn ein mange plantar og fuglar som er på raudlista. Nordvestre del av Skeisnesset er freda område for fugl.

– Dette er jordbrukslandskap med store biologiske og kulturhistoriske verdiar, skapt av menneske i samspel med naturen gjennom generasjonar. Å ta vare på vår natur- og kulturarv krev eit aktivt jordbruk, lokalt engasjement og statleg innsats. I 2021 er det med midlar frå miljø- og landbruksforvaltninga satt av til saman 38 millionar kroner for å ta vare på dei 46 utvalde kulturlandskapa vi har i Noreg, seier landbruks- og matminister Olaug Bollestad.

– Utvalde kulturlandskap i jordbruket er ei ordning som er basert på frivillig samarbeid og stort lokalt engasjement. Eg vil rose grunneigaren, lokal forvaltning, friviljuge og næringsaktørar for den viktige jobben dei gjer for å ta vare på desse områda, og dei store kulturhistoriske og biologiske verdiane dei inneheld, for nåverande og framtidige generasjonar, seier klima- og miljøminister Sveinung Rotevatn.

Frå storbonde til husmann

På Skei tronar Herlaugshaugen frå vikingtid, ein av Noregs største gravhaugar. I nærleiken er det og steinalderbuplassar og mange særprega gravrøyser. Leka utvalde kulturlandskap og Leka bygdemuseum, som og ligg på Skei, viser med bygningar, kulturminne og gardsstruktur ulike sosiale levekår frå storbonde til husmann.

Skeisnesset har i uminnelege tider vore felles beiteområde for bøndene på Skei. Her er det  utført skjøtselstiltak og tilrettelegging for friluftsliv. Skeisnesset kultursti, eit stort turvegnett med tilrettelagt informasjon, formidlar også Lekas geologi og Trollfjell UNESCO Global Geopark. Området er ettertrakta for rekreasjon og reiseliv. Frå Ivarshallaren amfi får ein på godversdagar flott utsyn over heile området og kystleia. Er det ruskever kan ein nyte dette i Amfiet som er «signalbygget» på Ivarshallaren.

Ved parkeringsplassen i Våttvika er det sett opp eit servicebygg med universelt utforma toalett og eit lite skjul.  Både Ivarshallaren og området ved parkeringsplassen er har status som statleg sikra friluftsområde.

Forstørr bilete

Forstørr bilete