Granskinga av UDI har vist at eit for stort press på å få ned sakshandsamingstida, kan svekkje sakshandsamingskvaliteten. UDI har derfor sett det naudsynt å setja i gong tiltak for å sikre kvaliteten i sakshandsaminga, samt sikre kvalitet i praksisutforming og regelverksarbeid og å styrkje internkontrollfunksjonen.

– Det er naudsynt å sikre at sakshandsaminga har tilstrekkeleg kvalitet og at den skjer i samsvar med regelverk og internasjonale konvensjonar, seier statsråd i Arbeids- og inkluderingsdepartementet Bjarne Håkon Hanssen i ein kommentar.

Å lyfte kvaliteten i sakshandsaminga fører til lågare produksjon enn det som står i målkrava for 2006. For å sikre at kvaliteten i vedtaksproduksjonen blir vareteken og for å kompensere for noko av produksjonsnedgangen i 2006, blir det derfor foreslått å løyve 9 millionar kroner til auka sakshandsamingskapasitet i UDI i 2006.

Det blir og foreslått å løyve 6,4 millionar kroner til eit prosjekt som er knytt til oppfølginga av granskingskommisjonen sin rapport i UDI. Oppfølgingsprosjektet har som målsetjing å gå gjennom og fremje forslag om endringar i direktoratet sin organisasjonsstruktur, intern og ekstern kommunikasjon, styringsforhold og kompetansenivå.