A-40/2008 Ikraftsetjing av endringar i utlendingslova og -forskrifta (tilvisingar til Dublin-regelverket)

Utlendingsdirektoratet
Utlendingsnemnda
Justis- og politidepartementet
Politidirektoratet
Utanriksdepartementet 

Nr.                                   Vår ref                                                      Dato
A-40/2008                        200601709                                               16.04.2008

Ikraftsetjing av endringar i utlendingslova og -forskrifta (tilvisingar til Dublin-regelverket)

Det er vedteke endringar i tilvisingane til Dublin-regelverket i utlendingslova og -forskrifta.

Bakgrunnen for endringane er at EU og Sveits 26. oktober 2004 underteikna to avtalar som knyter Sveits til samarbeidet om Dublin- og Schengen-regelverket. Noreg gjorde den 19. januar 2001 ein avtale med Island og Det europeiske fellesskap om kriterium og mekanismar for å avgjere kva stat som er ansvarleg for behandlinga av ein asylsøknad som blir lagd fram i Noreg, Island eller ein medlemsstat (avtale om tilknyting til Dublin-regelverket/tilknytings-avtalen). Vidare har Noreg sidan 25. mars 2001 delteke i det operative Schengen-samarbeidet. For at Dublin- og Schengen-regelverket skal kunne brukast i forholdet mellom Noreg/Island og Sveits, har desse landa framforhandla ein trepartsavtale som blei underteikna 17. desember 2004. Stortinget samtykka til trepartsavtalen 13. juni 2006, jf. St.prp. nr. 60 (2005–2006) og Innst. S. nr. 206 (2005–2006). Dei materielle føresegnene i denne avtalen viser til at innhaldet i dei parallelle avtalane som dei tre landa har med EU, også skal gjelde desse tre landa imellom, i den grad desse reglane er identiske. Trepartsavtala tok til å gjelde 1. mars 2008.

Dei tilvisingsteknikkane som er nytta i utlendingslova og -forskrifta med omsyn til samarbeid om Schengen-regelverket (generelle tilvisingar til Schengen-samarbeidet), gjør at det ikkje er nødvendig med endringar som følgje av at Sveits nå har slutta seg til Schengen-regelverket. Når det gjeld samarbeid om Dublin-regelverket derimot, var det i utlendingslova og -forskrifta vist spesifikt til Noreg sin tilknytingsavtale med Island og Det europeiske fellesskap. Gjennomføring av føresegnene i trepartsavtalen om samarbeid om Dublin-regelverket kravde derfor visse endringar i utlendingsregelverket.

På denne bakgrunn ble det i 2006 gjort endringar i utlendingslova §§ 17 første ledd bokstav e, 34 a første ledd første punktum, 37 femte ledd og 37 e første ledd, jf. endringslov 30. juni 2006 nr. 37.

Utlendingslova § 34 a første ledd første punktum lød før endringa:

”I den utstrekning Norge er forpliktet til det som deltaker i Schengensamarbeidet og samarbeidet i henhold til avtale mellom Norge, Island og Det europeiske fellesskap om kriterier og mekanismer for å avgjøre hvilken stat som er ansvarlig for behandlinga av en asylsøknad som fremlegges i Norge, Island eller en medlemsstat, kan utlendingsmyndighetene uten hinder av taushetsplikt oversende opplysninger om enkeltpersoner til myndighetene i land som deltar i slikt samarbeid, som ledd i eller til bruk ved behandling av sak om visum, asyl, bortvisning, utvisning eller oppholdstillatelse.”

Denne tilvisinga til tilknytingsavtalen, og ikkje til det materielle regelverket, opna for at det materielle regelverket kunne endrast, og for at det kunne kome fleire partar på EU-sida. Tilvisinga opna derimot ikkje for at Sveits kunne knyte seg til samarbeidet. Den nye tilvisinga måtte derfor i tillegg til dei endringar i regelverk og partsforhold som den gjeldande tilvisinga dekkjer, omfatte Sveits.

Utlendingslova § 34 a første ledd første punktum lyd etter endringa:

”I den utstrekning Norge er forpliktet til det som deltaker i Schengensamarbeidet og samarbeidet i henhold til avtalene mellom Norge, Island og Det europeiske fellesskap og mellom Norge, Island og Sveits om kriterier og mekanismer for å avgjøre hvilken stat som er ansvarlig for behandlingen av en asylsøknad som fremlegges i Norge, Island, Sveits eller en medlemsstat, kan utlendingsmyndighetene uten hinder av taushetsplikt oversende opplysninger om enkeltpersoner til myndighetene i land som deltar i slikt samarbeid, som ledd i eller til bruk ved behandling av sak om visum, asyl, bortvisning, utvisning eller oppholdstillatelse.”

Med den nye tilvisinga er det meint samarbeidet i samsvar med avtalen mellom Noreg, Island og Det europeiske fellesskap om kriterium og mekanismar for å avgjere kva stat som er ansvarleg for å behandle ein asylsøknad som blir lagd fram i Noreg, Island eller ein medlemsstat (tilknytingsavtalen), og samarbeidet i samsvar med avtalen mellom det sveitsiske eidsforbund, republikken Island og Kongeriket Noreg (trepartsavtalen), med unntak av føresegnene som berre omhandlar gjennomføringa, bruken og vidareutviklinga av Schengen-regelverket.

Dei tilsvarande tilvisingane i utlendingslova §§ 17, 37 og 37 e er òg endra. Det same er tilvisingane i utlendingsforskrifta § 21 fjerde ledd bokstav c og § 55 første ledd.

Departementet har etter at lovendringane blei vedtekne, oppdaga at det ved ein feil er vedteke endring i § 37 femte ledd, medan det er § 37 fjerde ledd andre punktum som skulle endrast. Denne inkurien må rettast opp gjennom eit nytt lovforslag til Stortinget. Endringa i § 37 fjerde ledd andre punktum kan difor ikkje tre i kraft før seinare. Etter at endringa i § 37 fjerde ledd andre punktum er vedteke, vil det også bli vedteke ei endring i utlendingsforskrifta § 129 femte ledd.

På grunn av at trepartsavtala tok til å gjelde 1. mars, har departementet valt å setje dei resterande lov- og forskriftsendringane i kraft før endringane i utlendingslova § 37 og utlendingsforskrifta § 129 er på plass. Endringane i utlendingslova § 17 første ledd bokstav e, § 34 første ledd første punktum og § 37 e femte ledd, samt endringane i utlendingsforskrifta § 21 fjerde ledd bokstav c og § 55 første ledd, trer difor i kraft 1. mai 2008. Departementet vil kome tilbake til dato for når endringane i utlendingslova § 37 fjerde ledd anna punktum og utlendingsforskrifta § 129 femte ledd trer i kraft.

Både lov- og forskriftsendringane ligg ved rundskrivet her. For forståinga av endringane visast det også til forarbeida til lovendringane, Ot.prp. nr. 73 (2005–2006) Om lov om endringar i utlendingslova (tilvisingar til det departementet som har hovudansvaret for utlendingsforvaltninga, tilvisingar til Dublin-regelverket, gjennomføring av EU si grenseforordning m.m.) og Innst. O. nr. 63 (2005–2006). Desse dokumenta finst elektronisk på departementet sine heimesider www.regjeringen.no/aid og på Stortinget sine heimesider www.stortinget.no.

Med helsing

Birgitte Ege e.f.                                          Nina E. D. Mørk
fung. ekspedisjonssjef                                seniorrådgjevar
                      

2 vedlegg:

• lovendringer
forskriftsendringer