Search Summit Norway

- IT-bransjen er et eksempel til etterfølging fordi dykk er flink til å være innovative og ta i bruk nye innovative løysningar, sa fornyings- og administrasjonsminister Heidi Grande Røys då hun opna konferansen Search Summit Norway, torsdag 3. april 2008.

Aller først: Takk for invitasjonen til ein spennande konferanse med ein agenda som fører oss rett inn i eit av dagens aller mest sentrale IKT-område ; organisering og søking etter informasjon.  
Søking etter informasjon er eit område som av og til gir grunnlag for undring: Når eg går inn på ei heimeside eller ein portal for å leite etter informasjon så er det ofte plent umogeleg å finne det eg leitar etter. Men dersom eg søkjer etter det same med ein søkjemotor (eller ”googlar” som vi no gjerne seier), så sprett eg gjerne inn på heilt riktig stad nett på den portalen der eg starta letingen. Når utvalet er nokre tusen dokument så finn eg det ikkje, men når utvalet er nokre milliardar så er eg inne på null komma null. Kvifor er det slik?  Eg undrast...

Eit anna døme: Når eg leiter etter eit tema eller ein avsendar i ei velfylt elektronisk postkasse på PC’en min, tek det ofte både vinter og vår før eg finn det eg leiter etter. Eg kan nesten ta ein kopp kaffi medan søket går. Men når eg leiter etter noko blant milliardar av dokument, gjerne i basar på den andre sida av kloden, tek det 0,1 sekund. Eg undrast...

Det er mange grunner til at dagens tema er uhyre spennande. Spesielt spennande er det at dette er eit område der Noreg ligg i fremste rekkje internasjonalt. Eg synest sjølvsagt at det er stas. Ofte skuldast dette at vi er eit rikt land med ei kjøpekraftig befolkning. Men nokre gonger, og dette er eit slikt høve, kan vi dra til litt ekstra: På søkjeområdet ligg Noreg så langt framme at fleire av dei fremste selskapa i verda har funne at Noreg er ein stad kor det er viktig å vere etablert og ein stad kor det er viktig å sikre seg grunnlag for vidare utvikling. For ei gongs skuld er det ikkje oljepengane, men kompetansen og hovuda våre som står i sentrum.
 
Det er ikkje alle som har hatt den store trua på folks kompetanse;
I 1906 var den britiske naturforskaren Francis Galton på landbruksutstilling. Der var det mellom anna ein konkurranse om å gjette slaktevekta på ein utstilt okse. Galton hadde lita tru på intelligens og danning hos ”mannen i gata”. Derfor hadde han heller ikkje mye tru på at folk flest kunne gjette slaktevekta. Men han var nysgjerrig og bad om å få sjå igjennom lappane folk leverte inn. Og stor var overraskinga då han granska resultata: Gjennomsnittet av folk sine gissingar (ca. 800 stemmer) var 1197 pund. Oksen si slaktevekt var 1198 pund !! Med andre ord: Gruppa sin gjetting var perfekt. Gruppa visste noko i fellesskap som gjekk ut over det den einskilde hadde oversikt over.

Eit anna døme: I USA har dei studert resultata og gissingane i ”Vil du bli millionær. Dei som har sett programmet veit at dei som sit i stolen har tre moglege ”livliner”: Kutt ut halvparten av svara, ring ein flink ven eller be publikum om hjelp. Og kva trur de er resultata? Dei fleste av oss vil vel tru at den flinke venen veit meir enn tilfeldige gissingar frå publikum?? Riktig svar: For den flinke vennen var det 61% sjanse for riktig svar. For publikum: 91 %!!
Eit siste døme: I 1986 skjedde den tragiske ulukka med romferja Challenger. 74 sekund etter oppskyting eksploderte ferja. Aksjekursen for de selskapa som hadde levert delar til romferja falt som en stein på aksjebørsen. For dei fleste blei det eit kortvarig aksjefall. Men for eitt selskap forblei kursen lav. Ingen visste då kva som var årsaka til eksplosjonen og ingen forklaring var meir fremme enn andre. Men etter 6 månader kom granskingsrapporten. Årsaka til eksplosjonen kom frå ein pakning nettopp frå det selskapet som hadde falt mest på børsen.

Eg brukar dette som illustrasjon på kor viktig det er at alle er med. I fellesskap kan og veit vi viktige ting. Eg har forstått det slik at dei beste søkjemotorane utnytter nettopp den kollektive kunnskapen. Sidene blir rangert etter kor mange som peikar på dei. Den kollektive kunnskap og innsikt vert samla og utnytta. Saman veit vi meir. Sjølv om det er mange rare meiningar og oppfatningar rundt om, så har vi i fellesskapet evner og moglegheiter som går ut over den einskilde. Derfor: Dagens søkjekunnskap går på mange måtar rett inn i den demokratiske kjerne.

Eit anna tema som òg har det demokratiske aspektet i seg, er
arbeidet vårt med digital inkludering. Alle skal ha kompetanse, ferdigheiter og  tilgang til nødvendig utstyr, for å kunne finne fram til og forstå den elektroniske informasjonen og dei elektroniske tenestene som dei søkjer.

Somme vil spørje om digital inkludering eigentleg er noko å bry seg om når Noreg toppar dei fleste internasjonale rankingar over PC-dekning og bruk av digitale tenester. Jo, nett derfor er inkludering viktig: Dess fleire digitale tenester og dess fleire brukarar , dess verre er det å stå utanfor.

Vi har mange initiativ og tiltak på dette området, men eit av dei mest sentrale nett no er regjeringa sitt  arbeid legge til rette for universell utforming av IKT-løysingar.

 Vi er no på veg mot ei sterkare vektlegging av fellesløysingar og felles standardar. Eitt av  måla er at vi ikkje skal bruke offentlege ressursar på å ”finne opp hjulet” mange gonger. Vi satsar derfor spesielt på etablering av  felles komponentar og løysingar som fleire kan ta i bruk på tvers av etatsgrensene. Vidareutvikling av næringslivsportalen Altinn er difor ei viktig satsing for regjeringa i denne samanhengen. Eit anna viktig område kor vi vil etablere felles løysingar for offentleg sektor er elektronisk ID og signatur.

Regjeringa vil stille klare krav til at offentlege verksemder i større grad må samarbeide om å etablering av fleire og betre tenester. Målet er å unngå parallelle investeringar. Opne standardar er ei føresetnad for at ulike system skal kunne ”snakke saman”, og er difor eit viktig element i regjeringa sin IT-politikk. DIFI vil ha ei sentral rolle med å hjelpe til samordning og utvikling i offentleg sektor.

Nyskaping og innovasjon er avgjerande for å møte ein stadig tøffare internasjonal konkurranse. Regjeringa vil i løpet av året leggje fram ei stortingsmelding om innovasjon, og dette arbeidet blir leidd av Nærings- og handelsdepartementet.
Vi må stimulere menneske med pågangsmot og skaparevne, slik at Noreg blir eit attraktivt land for utvikling av nye idear og verksemder.
Innan søkjarteknologi har de synleggjort at dette er mogeleg.

Lukke til med konferansen!