Finansdepartementet legg i dag fram  proposisjonen om ny saldering av statsbudsjettet for 2005. I proposisjonen vert det gjort greie for blant anna endringar i statsbudsjettet som er vedtekne av Stortinget eller foreslått i proposisjonar frå Regjeringa Bondevik II og Regjeringa Stoltenberg II tidlegare i år og anslagsendringar for skattar og avgifter.

Etter at Stortinget vedtok budsjettet i fjor haust er det oljekorrigerte underskotet på statsbudsjettet redusert med 3,7 milliardar kroner til 70,6 milliardar kroner. Det oljekorrigerte underskotet tilsvarer den faktiske bruken av oljepengar. Reduksjonen i det oljekorrigerte underskotet skuldast i stor grad reduserte regelstyrte utgifter i Folketrygda sine ordningar med knapt 4 milliardar kroner sidan statsbudsjettet blei vedteke hausten 2004.

Den reelle, underliggjande utgiftsauken vert no anslått til 2 pst. frå rekneskap 2004 til anslag på rekneskap 2005. I Nasjonalbudsjettet 2005, som blei fremja hausten 2004 av Regjeringa Bondevik II, blei den reelle, underliggjande utgiftsauken anslått til om lag 1¾ pst. Anslaget var uendra i Revidert nasjonalbudsjett 2005.

I Nasjonalbudsjettet 2005 blei det strukturelle, oljekorrigerte underskotet anslått til 66,4 milliardar kroner. Anslaget blei nedjustert med 1,1 milliardar kroner i Revidert nasjonalbudsjett 2005, til 65,3 milliardar kroner. I Nasjonalbudsjettet 2006 blei anslaget satt ned med ytterlegare 3 milliardar kroner som følgje av oppjusterte anslag for skattar og avgifter mv. Det strukturelle, oljekorrigerte budsjettunderskotet blei dermed anslått til 62,3 milliardar kroner. Bevilgningsendringar som blir foreslått i samband med nysalderinga, yter til auka utgifter og reduserte inntekter utanom skattar og avgifter, på i alt drygt 1½ milliard kroner i 2005 i forhold til anslaga for 2005 i Nasjonalbudsjettet 2006. Samtidig aukar statsbudsjettet sine skatte- og avgiftsinntekter i 2005 med drygt ½ milliard kroner. Desse endringane yter dermed isolert sett til å auke det strukturelle, oljekorrigerte underskotet i 2005 med om lag 1 milliard kroner i forhold til anslaget i Nasjonalbudsjettet 2006. Det strukturelle, oljekorrigerte underskotet kan etter dette anslåast til 63,3 milliardar kronar. Finansdepartementet vil kome tilbake med oppdaterte tal for det strukturelle underskotet i 2005 i samband med statsrekneskapen for 2005 og Revidert nasjonalbudsjett 2006, som ein del av ein ny, samla gjennomgang av utviklinga i norsk økonomi.

Netto kontantstraumen frå petroleumsverksemda er auka med om lag 78,5 milliardar kroner frå saldert budsjett til nysalderinga og vert no anslått til om lag 283 milliardar kroner. Dette skuldast blant anna at skattar og avgifter frå petroleumsverksemda er auka med 42 milliardar kronar frå saldert budsjett 2005, mens inntektene frå SDØE er auka med 33,1 milliardar kroner, begge delar i hovudsak som følgje av høgare oljepris enn lagt til grunn då statsbudsjettet blei vedteke i fjor haust.