Regjeringa skisserte i Revidert nasjonalbudsjett eit forslag til lemping i skattlegginga på Svalbard for inntektsåra 2006 og 2007. I dag blir forslaget sendt ut på høyring med frist til måndag 28. august. Det blir teke sikte på å fremje det endelege forslaget i budsjettet for 2007.

Forslaget består i at alle som er skattemessig busett på Svalbard i meir enn tolv månader skal få eit frådrag i skatt på inntil 7 200 kroner. Dette svarer til eit frådrag i lønnsinntekt på om lag 60 000 kroner. Vidare blir det foreslått å innføre eit eige svalbardtillegg i barnetrygda tilsvarande tillegg som blir ytte til foreldre og forsørgjarar busett i Finnmark og i einskilde kommunar i Nord-Troms.

Bakgrunnen for forslaget er auken i skattesatsen på lønn på Svalbard som Stortinget har vedteke skal gjerast gjeldande frå og med i år. Denne satsauken skuldast behov for å harmonisere skattesatsane på lønn og eigarinntekter frå selskap og næringsverksemd som ledd i skattereforma 2004-2006.

For å motverke uheldige verknader av satsauken særleg for låginntektsgrupper, er det etter Regjeringa si vurdering behov for slike lempande tiltak som blir foreslått i høyringsutkastet. Desse tiltaka skal etter forslaget ha verknad for inntektsåra 2006 og 2007.

Etter Regjeringa si vurdering er det viktig å oppretthalde busetjing og aktivitet på Svalbard. Det er nedsett ei arbeidsgruppe som skal vurdere skattesystemet på Svalbard, og som i arbeidet sitt skal leggje vekt på korleis skattesystemet kan yte til å oppretthalde busetjing og aktivitet på Svalbard. Gruppa skal i utgangspunktet leggje fram rapporten sin innan 1. desember 2006. Gruppa blir forventa å leggje fram forslag til konkrete endringar i skattesystemet for Svalbard, som eventuelt kan gjerast gjeldande frå og med inntektsåret 2008. I påvente av slike endringar blir det lagt opp til lempande tiltak for inntektsåra 2006 og 2007.

Lenke til høyringa