Finansdepartementet mottok i dag Banklovkommisjonen si utgreiing om fellespensjonskasser. - Lovendringar i tråd med Banklovkommisjonen sitt utkast vil kunne leggje til rette for kostnadseffektive løysingar for kollektive pensjonsordningar, seier finansminister Kristin Halvorsen.

Finansdepartementet gav 26. august 2005 Banklovkommisjonen i oppdrag å utgreie, og foreslå reglar for fellespensjonskasser. Mandatet har bakgrunnen sin i Stortinget sitt anmodingsvedtak 10. juni 2005 der Regjeringen blei bedd om å fremje lovforslag om ” fellespensjonskasse for fleire private verksemder, utan fellesordning for premieutrekning, etter mønster av ei interkommunal pensjonskasse.” Banklovkommisjonen har utarbeidt utkast til nødvendige lovendringar for at fleire uavhengige føretak skal kunne gå saman og etablere ei fellespensjonskasse for tenestepensjonsordningane til føretaka.

Kommisjonen si utgreiing vil sendast på høyring med høyringsfrist 14. august 2006.

Kapittel 0 i utgreiinga er eit samandrag av Banklovkommisjonens forslag. Les utgreiinga her.

Spørsmål om utgreiinga kan rettast til
Banklovkommisjonen sin leiar, prof. dr. juris Erling Selvig, tlf. 22 85 97 45.
Banklovkommisjonen sin hovudsekretær, Lise Ljungmann, tlf. 22 31 69 34.