CO2-avgift på naturgass og LPG

Regjeringa foreslår å innføre CO₂-avgift på gass med verknad frå 1. juli i år. Avgifta vil være på same nivå som CO₂-avgifta for mineralolje og omfatte oppvarming av bygg og landbasert transport. Gass til bruk i industrien og til verksemder med kvotepliktige utslepp, får redusert avgift. Regjeringa tek òg sikte på at gass til bruk i innanriks skipsfart skal få fritak for avgifta.

Stortinget har tidlegare vedteke å innføre CO₂- avgift på gass. Vedtaket er ikkje sett i verk fordi avgifta truleg ikkje hadde blitt godkjent av EFTAs overvakingsorgan (ESA). Dagens framlegg er i tråd med regelverket for offentleg støtte i EØS-avtala.

Den allmenne avgifta på LPG og naturgass er sett til same nivå som for mineralolje, rekna som kroner per tonn CO₂. For 2010 gjeld avgiftssatsar på 0,43 kroner per Sm³ naturgass og 0,65 kroner per kg LPG, som svarer til 218 og 217 kroner per tonn CO₂. Forslaget vil føre til at ein større del av utsleppa av klimagassar vil bli pålagt avgifter. Skilnaden mellom dette forslaget og vedtaket i budsjettet for 2010 er at landbasert transport får den generelle CO₂-avgifta.

Forslaget inneber vidare at gass til bruk i industrien – på same måte som i el-avgifta – får redusert sats. Det same gjeld gass til bruk i kvotepliktige verksemder. Denne satsen er 0 kroner for LPG og 0,05 kroner per Sm³ naturgass. Gass som blir nytta til kjemisk reduksjon eller elektrolyse, metallurgiske eller mineralogiske prosessar, får fullt fritak sidan dei ikkje er omfatta av energiskattedirektivet.

Fiske og fangst i nære og fjerne farvatn og veksthusverksemda får fritak for avgifta. Regjeringa tek òg sikte på at gass til bruk i innanriks skipsfart skal få fritak for avgifta så snart det er heilt avklart at eit slikt fritak er i samsvar med EØS-avtala.