Fiskeri- og kystdepartementet har fastsett regulering av fisket etter torsk, hyse og sei nord for 62ºN i 2006. Norske fartøy kan fiske 212.700 tonn torsk, 66.800 tonn hyse og 175.500 tonn sei i 2006. Tala for 2005 var 218.700 tonn torsk, 65.300 tonn hyse og 200.000 tonn sei.

I 2006 er alle fartøy som fiskar torsk regulerte med garanterte kvoter som gjeld heile året. Det er valt å legge vekt på ro og stabilitet i reguleringa av fisket, slik at forholda ligg til rette for satsing på kvalitet og avtalar mellom kjøparane og fiskarane. Dette vil kunne auke verdiskapinga i torskefisket.

Samlekvote

Fartøy under 15 meter i gruppe I og alle fartøy i gruppe II er regulerte med samlekvoter av torsk, hyse og sei.

Samlekvoten blir gitt som eit garantert kvantum, og er ikkje periodisert. Bifangst av torsk, hyse og sei skal dekkast av samlekvoten. Det enkelte fartøyet i gruppe I kan fiske 70 prosent av samlekvoten som torsk, medan fartøy i gruppe II kan fiske 75 prosent av samlekvoten som torsk. I

I gruppe I er samlekvoten i 2006 frå 31,8 tonn for fartøy under 7 meter til 103,1 tonn for fartøy mellom 14 og 15 meter, medan samlekvoten for fartøya i gruppe II varierer mellom 15,5 og 29,4 tonn. I 2005 var tilsvarande tal frå 30,1 til 107,6 tonn, og i gruppe II fra 15,0 og 28,5 tonn.

Torsk

Den norske torskekvoten er fordelt med 148.741 tonn (69,92%) til fartøy som fiskar med konvensjonelle reiskap (garn, line, snurrevad og snøre), og 63.959 tonn (30,07%) til trålarane.

Fartøy over 28 meter som fiskar med konvensjonelle reiskap kan fiske 19.054 tonn, og er regulert med fartøykvoter. Fartøy under 28 meter i gruppe I kan fiske 115.557 tonn, og fartøy i gruppe II kan fiske 14.130 tonn i 2006.

Fartøy i gruppe I mellom 15 og 28 meter er regulert med garanterte fartøykvoter utan periodisering. Det er ikkje sett av eit eige kvantum torsk til bifangst utover det som er sett av til distriktskvote, så fartøya må dekke eventuell bifangst av torsk i fisket etter andre artar innanfor fartøykvoten. Fartøykvotene for denne gruppa er frå 72,3 tonn for fartøy på 15 meter til 128,9 tonn for fartøy på 27 til 28 meter. I 2005 var tilsvarande tal frå 74,7 til 135,4 tonn.

Fartøy med torsketrålløyve med kvotefaktor 1,00 kan fiske 676 tonn torsk i 2006, mot 721 tonn i 2005.

Hyse

Den norske hysekvoten blir fordelt med 41.416 tonn (62%) til fartøy som fiskar med konvensjonelle reiskap og 25.384 tonn (38%) til trålarane.

Fartøy over 28 meter som fiskar med konvensjonelle reiskap kan fiske 7.455 tonn, og er regulert med maksimalkvoter på 95 tonn. Fartøy under 28 meter i gruppe I kan fiske 30.648 tonn, og fartøy i gruppe II kan fiske 3.313 tonn i 2006.

Fartøy i gruppe I mellom 15 og 28 meter er regulert med garanterte fartøykvoter på 50 tonn utan periodisering. Fartøya må dekke eventuell bifangst av hyse i fisket etter andre artar innanfor fartøykvoten.

Fartøy med torsketrålløyve med kvotefaktor 1,00 kan fiske 297 tonn hyse i 2006.

Sei

Den norske kvoten er fordelt med 66.595 tonn (38%) til fartøy som fisker med konvensjonelle reiskap, 43.812 tonn (25%) til notfartøya og 64.843 tonn (37%) til trålarane. 250 tonn av kvoten er sett av til agnformål.

Fartøy over 28 meter som fiskar med konvensjonelle reiskap kan fiske 7.326 tonn, fartøy under 28 meter i gruppe I kan fiske 49.946 tonn, og fartøy i gruppe II kan fiske 9.323 tonn sei i 2006.

Fartøy i gruppe I mellom 15 og 28 meter er regulert med maksimalkvoter mellom 106 og 188 tonn. Desse fartøya kan ha 25 prosent bifangst av sei ved landing når det direkte fisket har stoppa eller når fartøyet har fiska maksimalkvoten.

Fartøy som fiskar sei med not kan fiske mellom 231 og 651 tonn.

Torsketrålarane kan fiske 51.874 tonn av trålkvoten og seitrålerne kan fiske 11.969 tonn etter at det er avsett 1.000 tonn til dekking av bifangst i industritrålfisket.

Trålgruppa er regulert med fartøykvoter. Fartøy med torsketrålløyve har desse kvotene: Fabrikktrålarar 783 tonn, ferskfisk- og rundfrysetrålarar 593 tonn og småtrålarar 344 tonn. Fartøy med seitrålløyve får kvoter etter ein stige frå 391 tonn til 1.117 tonn.

Påskestopp

Det blir innført påskestopp i fisket etter torsk og hyse frå laurdag 8. april kl. 17.00 til måndag 17. april kl. 16.00. For trålarane og fartøy som fiskar med snurrevad gjeld påskestoppen til tysdag 18. april kl. 10.00. Det vil ikkje bli innført påskestopp for direktefisket etter sei.

• Forskrift om regulering av fisket etter torsk, hyse og sei nord for 62°N i 2006
• Pressemeling om vernetiltak for norsk kysttorsk