Fiskeri- og kystdepartementet har fastsett regulering av seifisket sør for 62. graden for 2006. Norske fiskarar kan i 2006 fiske 61.090 tonn sei.

- Seibestanden er framleis i rimeleg god forfatning, men ein viss nedgang gjer at vi i samråd med EU har sett ned kvoten med 15 % i tråd med forvaltningsplanen. Med det håpar eg vi vil sikre fiskarane eit stabilt langtidsutbytte, seier statssekretær Vidar Ulriksen.

Gruppekvoten for notfartøy utgjer 5.500 tonn og for konvensjonelle fartøy 8.000 tonn. Resten av den norske seikvoten vert tildelt trålarane. Industri- og nordsjøtrålarane får ein gruppekvote på 8.407 tonn. Av gruppekvoten til industri- og nordsjøtrålarane er det sett av 4000 tonn for å dekke bifangst av sei i industritrålfisket. Torsketrålarane får ein gruppekvote på 31.090 tonn, medan seitrålarane kan fiske 8.092 tonn sei i 2006.

Fartøy som fiskar med konvensjonelle reiskap vert regulerte med maksimalkvotar på 600 tonn. Det konvensjonelle fisket for fartøy over 28 meter vert stogga når det står att 1.400 tonn av gruppekvoten.

Trålarane vert regulerte med maksimalkvotar. Fabrikktrålarane kan fiske 1.190 tonn, ferskfisk- og småtrålarane kan fiske 850 tonn, og seitrålarane kan fiske inntil 950 tonn.

Fartøy med industritrålløyve vert regulerte med maksimalkvotar på 400 tonn, medan fartøy med avgrensa nordsjøtrålløyve kan fiske 30 tonn. Desse trålgruppene har ein garantert kvote på 30 tonn.

I tråd med den biologiske rådgjevinga vert det direkte trålfisket stogga frå og med 26. juni til og med 6. august.

• Forskrift om regulering av fisket etter sei i Nordsjøen og Skagerrak i 2006