Fiskeri- og kystminister Helga Pedersen har gitt Innovasjon Noreg klårsignal til å sette i gang det marine innovasjonsprogrammet. I statsbudsjettet for i år er det sett av 40 millionar kroner til programmet.

- Hovudmålet er at den marine sektoren i Noreg skal kunne tilby den sjømaten som marknadane verda rundt ønskjer. Det er på den måten vi kan styrke bedriftene i fiskeri- og havbruksnæringa og utvikle arbeidsplassar i Kyst-Noreg, seier Helga Pedersen.

Pedersen viser til at mange norske sjømatbedrifter har ei utfordring i å framstå som attraktive og forhandlingssterke leverandørar som kan tilfredsstille krava i sjømatmarknadane. Til sjuande og sist er det berre bedriftene sjølve som kan nå måla om auka verdiskaping.

- Gjennom det marine innovasjonsprogrammet vil eg sette bedriftene i førarsetet for ein ny giv og stimulere til samarbeid mellom bedrifter i nettverk. Nettverka skal følgjast nøye opp og det skal byggast kompetanse i bedriftene for langsiktig strategisk innsats. Eg ventar at slike nettverk skal kunne utløyse høgre verdiar av norsk sjømat enn bedriftene kan kvar for seg, seier Helga Pedersen.

Det marine innovasjonsprogrammet er ope for alle delar av fiskeri- og havbruksnæringa og alle ledd i verdikjeden. Innovasjon Noreg har utarbeidd framlegget til program og skal leie programmet. Det vert eit aktivt samarbeid med fylka i gjennomføringa av programmet.

Fiskeri- og kystdepartementets brev til Innovasjon Norge 24.03.06