Noreg er vertskap for den ellevte nordatlantiske fiskeriministerkonferansen som vert halden på hurtigruta mellom Tromsø og Brønnøysund 8. og 9. juni.

- På konferansen vil vi utveksle synspunkt og diskutere løysingar på ei rekkje viktige fiskeripolitiske spørsmål. Ei sentral utfordring er å kunne styrke dei regionale fiskeriorganisasjonane, så som Den nordaustatlantiske fiskerikommisjonen (NEAFC), seier fiskeri- og kystminister Helga Pedersen.

- Eit særleg viktig tema på konferansen er tiltak for å redusere ulovleg fiske i Nord-Atlanteren. Frå norsk side vil vi spesielt ta til orde for å styrke flaggstatsansvaret for å få bukt med det ulovlege fisket. For å kunne redusere landingar av ulovleg fanga fisk går Noreg også inn for å styrke hamnestatane sine kontrolltiltak gjennom NEAFC. Dette er utfordringar som berre kan løysast gjennom internasjonalt samarbeid, seier Helga Pedersen.

I tillegg til fiskeri- og kystminister Helga Pedersen deltar følgjande ministrar på konferansen:, Bjørn Kalsø for Færøyene, Einar Gudfinnson for Island og Finn Karlsen for Grønland. Også EU-kommisæren for fiskeri Joe Borg tar del. Frå Russland møter leiaren for Fiskeriavdelinga i Landbruksdepartementet Aleksander Fomin, og frå Canada møter assisterande departementsråd (Assistant Deputy Minister) for Fiskeri og havdepartementet David Bevan.

Konferansen vert avslutta før markeringa av Kystens dag i Brønnøysund 9. juni om ettermiddagen.

Priv til red:

Ved avslutninga av Den nordatlantiske fiskeriministerkonferansen vert det eit møte med media om bord i hurtigruteskipet Polarlys fredag 9. juni kl.14.45 – 15.15.

Etterpå vert det høve til fotografering på dekk under innseglinga til Brønnøysund.

Siste stopp for ombordstiging i Polarlys før dette er Sandnessjøen kl.13.30.