Regulering av fisket etter torsk i Nordsjøen i 2007
Historisk arkiv
Publisert under: Regjeringen Stoltenberg II
Utgjevar: Fiskeri- og kystdepartementet
Pressemelding | Dato: 15.12.2006 | Sist oppdatert: 16.12.2006
Fiskeri- og kystdepartementet har fastsett forskrift om regulering av fisket etter torsk i Nordsjøen og i Skagerrak i 2007. På bakgrunn av den vanskelege bestandssituasjonen for torsk i Nordsjøen, har Noreg og EU fastsett ein totalkvote på 19 957 tonn, noko som er det lågaste nokonsinne. Norsk kvote i 2007 er på 2 971 tonn.
Pressemelding
Nr.: 118/2006
Dato: 15.12.06
Kontaktperson: Ekspedisjonssjef Johán H Williams, tlf. 22 24 64 40 og avdelingsdirektør Kirsti Henriksen, tlf. 22 24 64 91
Regulering av fisket etter torsk i Nordsjøen i 2007
Fiskeri- og kystdepartementet har fastsett forskrift om regulering av fisket etter torsk i Nordsjøen og i Skagerrak i 2007. På bakgrunn av den vanskelege bestandssituasjonen for torsk i Nordsjøen, har Noreg og EU fastsett ein totalkvote på 19 957 tonn, noko som er det lågaste nokonsinne. Norsk kvote i 2007 er på 2 971 tonn.
Bestandssituasjonen for torsk i Nordsjøen er framleis vanskeleg og det er også i 2007 nødvendig å vidareføre ei streng regulering av dette fisket. Dette inneber at eit direkte fiske etter torsk berre er tillete for fartøy som fiskar med konvensjonelle reiskap. Alt trålfiske skal framleis regulerast med strenge bifangstreglar. Bifangstavsetninga til trålarane er på 1 000 tonn.
Reguleringa inneber at fartøy som fiskar med konvensjonelle reiskap kan drive eit direktefiske etter torsk innanfor ein gruppekvote på 1 971 tonn i 2007, inklusive bifangst på 300 tonn.
Det er fastsett maksimalkvotar for torskefisket med konvensjonelle reiskap i Nordsjøen i 2007. Fartøy som har løyve til å delta i lukka gruppe og som er under 15 meter kan fiske inntil 30 tonn, fartøy mellom 15 og 21 meter kan fiske inntil 60 tonn, og fartøy over 21 meter kan fiske inntil 120 tonn. Fartøy i open gruppe som er under 21 meter kan fiske 5 tonn, og fartøy over 21 meter i open gruppe kan fiske maksimalt 20 tonn.
Fartøy som fekk dispensasjon frå forbodet mot direktefiske i Skagerrak i 2006, kan fiske innanfor ein maksimalkvote på 7 tonn. Dette er ein reduksjon frå 8 tonn i 2006.
Når gruppekvoten er nådd eller fartøyet har fiska sin maksimalkvote, kan fartøy som hadde løyve til å delta i direktefisket, ha maksimalt 20 % bifangst av torsk i fisket etter andre artar.
Konvensjonelle fartøy på eller over 28 meter som ikkje har løyve til å delta i direktefisket, kan ha inntil 20 % bifangst av torsk ved fiske etter andre artar.
Fartøy som fiskar med trål kan ha inntil 2,5 % bifangst av torsk i fisket etter andre artar.