Opnar senter for lakselusforsking ved Universitetet i Bergen

Fiskeri- og kystminister Lisbeth Berg-Hansen opnar fredag senteret for lakselusforsking ved Universitetet i Bergen.

Tid og stad: fredag 9. september klokka 10.00 på VilVite-senteret, Thormøhlensgate 51 i Bergen.

Lakselus er ei av dei store utfordringane i havbruksnæringa. Senteret for lakselusforsking skal gjennom målretta forsking bidra til å sikre ei berekraftig næring. Målet er å få fram ny kunnskap som vil gi nye metodar for å nedkjempe lakselus.

Forskingssenteret har fått status som Senter for forskingsdriven innovasjon (SFI). SFI-ordninga har som mål og styrkje innovasjonen gjennom å satse på langsiktig forsking i eit nært samarbeid mellom forskingsintensive bedrifter og framståande forskingsmiljø. Ordninga skal styrkje teknologioverføring, internasjonalisering og forskarutdanning.

Senteret for lakselusforsking vil vere eit samarbeid mellom forsking og næringsliv med til saman ni partnarar, der fire er akademiske og fem er frå industrien.

Kontaktperson:
Kommunikasjonsrådgivar Halvard Wensel mob. 971 80 784