Endringar i losteneste og gebyr

Statssekretær Vidar Ulriksen varsla revisjon av rammene for lostenesta og i gebyr- og avgiftsstrukturen innan sjøtransporten då han tala på årsmøtet i Norsk Losforbund i Trondheim i dag. Regjeringa vil sikre like konkurranseforhold mellom transportformene på sjø og land.

Forslaga til endringar skal sendast på høyring i 2009.

- Vi ønskjer meir tidsretta reglar om losplikt, sa Ulriksen som også varsla tiltak for å gjere det enklare å få farleibevis, basert på meir vekt på praktisk kompetanse. Det inneber at fleire skipsførarar vert klarerte for å føre fartøyet langs kysten utan bruk av los.

Regjeringa vil ha ein samla gjennomgang av gebyr og avgifter innan sjøtransporten i samband med rulleringa av Nasjonal transportplan. I forlenginga av dette er det også naturleg å sjå på strukturen i gebyra som Kystverket krev inn.