Fleire tiltak for å få unge inn i fiskeria

- Fiskerinæringa har alle føresetnader for å trekkje til seg unge menneske, og regjeringa set inn ei rekkje tiltak for å fremme rekrutteringa. Vi må alle sjå til å få fram at næringa har gode framtidsutsikter, gode arbeidsforhold og kan tilby god løn, sa statssekretær Vidar Ulriksen på årsmøtet i Troms Fiskarfylking i dag.

Blant tiltaka er auken i fiskarfrådraget til 115.000 kroner i 2008, det nye prosjektet for auka rekruttering til marin sektor og forslaget frå regjeringa om støtte til unge fiskarar som ønskjer å etablere seg med eige fartøy. Regjeringa foreslår å dele ut 30 etableringsstipend til unge fiskarar og inntil 30 nye deltakarløyve i lukka fiskeri over ein periode på tre år.

Vidar Ulriksen viste også til den store framgangen internasjonalt i kampen mot ulovleg fiske.

- Då er det ekstra trist at det i år er fleire saker som er melde til politiet her heime. For det første fordi lovbrot aldri kan godtakast. For det andre fordi det svekkar truverdet vårt internasjonalt. Det er viktig å kunne marknadsføre lovleg fanga fisk, men då må de også ta konsekvensane og bidra til å rydde opp, sa Ulriksen.