Meir gods på kjøl

-Regjeringa vil stimulere til vekst i sjøtransporten, og den økonomiske ramma til maritim infrastruktur i Nasjonal transportplan 2010-2019 er auka med 77 prosent samanlikna med førre transportplan. I oppfølginga av NTP 2010-2019 er gebyr- og avgiftsnivået for sjøtransporten redusert med nærare 90 millionar kroner på tre år, og regjeringa vurderer ytterlegare reduksjon av avgiftsnivået, sa fiskeri- og kystminister Lisbeth Berg-Hansen i innlegget sitt. Ho understreka samtidig at godstransport på sjø skal høgre på agendaen i samferdselsdebatten.

Lostenesta er eit viktig sjøsikkerheitstiltak. Samtidig legg lostenesta viktige rammevilkår for sjøtransporten, med ei kostnadsramme på 650 millionar kroner, finansiert av brukarane. Regjeringa ønskjer derfor å vidareutvikle ei framtidsretta, kostnadseffektiv og brukarvennleg losteneste, som tek vare på sikkerheita og miljøet og legg til rette for næringsaktivitet. Det er derfor bestemt at det skal setjast ned eit offentleg utval med representantar frå ulike aktørar for å ta ein brei gjennomgang av lostenesta og regelverket. Utvalet skal etter planen levere innstillinga si mot slutten av neste år, og det blir no arbeidd med samansetjinga av utvalet.

- For å få på plass ein heilskapleg sjøtransportpolitikk er det heilt avgjerande at alle gode krefter dreg i same retning. Både staten, transportørane, reiarlaga, vareeigarane og hamnene har eit ansvar for at vi skal lukkast, og kvar især må vurdere nye tiltak og verkemiddel for å byggje opp om sjøtransporten som del av logistikkjeda. Eg ser derfor fram til eit samarbeid om ein strategi for nærskipsfart som eit viktig bidrag i denne samanhengen, understreka Berg-Hansen i innlegget sitt.