Satsar på unge forskarar og stipendiatar

Med budsjettforslaget for 2014 har regjeringa auka den offentlege forskingsinnsatsen reelt med over 34 prosent sidan 2005. I 2014 vil regjeringa øyremerkje 50 millionar kroner til talentfulle unge forskarar. Regjeringa vil òg opprette 60 nye stipendiatstillingar.

– Dei auka forskingsløyvingane viser at denne regjeringa har prioritert forsking og utvikling høgt. 2014-budsjettet inneheld òg ei ekstra satsing på unge forskarar og stipendiatar. Vi prioriterer unge forskartalent fordi vi ønskjer meir fornying og vågemot i forskinga, seier kunnskapsminister Kristin Halvorsen.

Ein realvekst på om lag 34 prosent utgjer 7,4 milliardar kroner. Den offentlege FoU-innsatsen har auka frå 0,79 prosent av BNP i 2005 til 0,93 prosent av BNP i 2014. Målet for offentleg finansiering er 1 prosent. Den offentlege FoU-innsatsen utgjer 28,9 milliardar kroner i 2014.

For å bidra til at fleire unge talent skal nå opp i konkurransen med dei meir etablerte forskarane, styrkjer regjeringa ordninga med fri prosjektstøtte (FRIPRO) med 50 millionar kroner, øyremerkt forskarar som er tidleg i karrieren. «Fellesløftet 2» inneber at dersom staten bidreg med 50 millionar kroner årleg i tre år, har universiteta lova å bidra med ein tilsvarande sum av eigne midlar. Slik vil den totale satsinga bli 300 millionar kroner over tre år. Vidare satsar regjeringa på 60 nye stipendiatstillingar i budsjettet for 2014.

Forskingsløyvingane går over budsjetta til fleire av departementa. Regjeringa har prioritert infrastruktur for forsking, mellom anna gjennom om lag 1,7 milliardar kroner til bygg i universitets- og høgskulesektoren, forskingsfartøy og midlar til å greie ut om mellom anna nytt anlegg for livsvitskap ved Universitetet i Oslo og Ocean Space Centre – eit nytt marinteknisk senter ved Marintek/NTNU i Trondheim. Regjeringa har i tillegg varsla at Noreg tek sikte på å delta som fullverdig medlem i EUs nye forskings- og innovasjonsprogram Horisont 2020, gitt at Stortinget samtykkjer. Noregs bidrag er anslått til 360 millionar kroner i 2014.

Regjeringa innfører òg ei ny gåveforsterkingsordning for å stimulere til fleire private gåver til forsking. Ordninga inneber at staten gir eit tillegg på 25 prosent av gåvebeløpet ved private gåver til Noregs forskingsråd, Det Norske Videnskaps-Akademi i Oslo, universiteta eller høgskular med rett til å dele ut doktorgrad. Det er sett av 50 millionar kroner til ordninga i 2014. Ordninga vil gjelde for gåver over 3 millionar kroner som er gitt etter 1. januar 2014.