Regjeringa gjer framlegg om ei løyving på 1,5 millionar kroner til å førebu og gjennomføra konkurranse for bygging av Østsamisk museum i Neiden.

Statsbygg har foreslått ein ny konkurranse og peika på moglege forenklingar i prosjektet. På dette grunnlaget kan planlegginga vidareførast i 2006 slik at prosjektet kan starta opp neste år. I 2006 treng Statsbygg 1,2 millionar kroner til å førebu og gjennomføra ein ny konkurranse og til arbeidet med forenklingar av prosjektet.

For å få til ei god formidling av østsamisk kultur og historie når bygningen er ferdig, må planlegginga av utstillinga starta i år. Østsamisk museum treng 300 000 kroner til dette arbeidet. Det er ikkje løyvd pengar til prosjektet i 2006.

I St.prp. nr. 1 (2005-2006) opplyste Kultur- og kyrkjedepartementet at tilboda frå entreprenørane for bygging av Østsamisk museum låg monaleg over dei budsjetterte kostnadene, og at prosjektet ikkje kunne gjennomførast innanfor budsjettramma. Departementet opplyste at ein ville drøfta vidareføringa av prosjektet med Sametinget og Statsbygg og koma attende til Stortinget med saka.