Kultur- og kyrkjedepartementet legg i dag fram eit høyringsnotat med framlegg om lovfesting av prinsippet om redaksjonell fridom i media.

- Regjeringa ønskjer å slå ring om prinsippet om redaksjonell fridom og meiner dette er særleg viktig i ei tid med raske endringar på mediesektoren, seier kultur- og kyrkjeminister Trond Giske.

Etter modell av Redaktørplakaten slår lovutkastet fast at redaktøren skal leie den redaksjonelle verksemda og treffe avgjerder i redaksjonelle spørsmål innanfor ramma av grunnsynet og føremålet som verksemda byggjer på.

Vidare slår utkastet fast at eigarane ikkje kan instruere eller overprøve redaktøren i redaksjonelle spørsmål.