Sterk kultursatsing i Rogaland

Regjeringa foreslår i statsbudsjett for 2009 å auke løyvinga til Stavanger Symfoniorkester med 7,3 millionar til 53,2 millionar kroner. I tillegg legg regjeringa inn eit investeringstilskot på 20 millionar kroner til bygging av eit nytt konserthus i Stavanger. Ramma for det statlege tilskotet er 250 millionar.

- Kulturbudsjettet for 2009 inneheld ei brei kultursatsing i Rogaland. Orkester, teater og museum er område i Rogaland som vil oppleve eit formidabelt økonomisk lyft neste år, seier kultur- og kyrkjeminister Trond Giske. 

Rogaland Teater får ein auke i tilskotet på 4 millionar kroner og dermed 42,9 millionar kroner i alt, mens Haugesund teater får 1 million meir, til saman 7,1 millionar kroner.

Det er òg lagt inn midlar til museumssatsing i Rogaland. Regjeringa foreslår å setje av 2 millionar kroner til ei museumskonsolidering der Stavanger Museum og Rogaland kunstmuseum inngår. Ryfylkemuseet får auka tilskotet med 0,53 millionar til 3,4 millionar kroner.

Regjeringa foreslår også å auke tilskotet til Jærmuseet med 0,7 millionar kroner og til Rogaland Kunstmuseum med 0,3 millionar kroner for å frigjere spelemidlar i samband med at Den kulturelle skulesekken skal utvidast til den vidaregåande skulen.  

Også mange mindre kulturtiltak vil få auka støtte i 2009. Kammermusikkfestivalen i Stavanger får auka tilskotet med 0,2 millionar til 1,4 millionar kroner, Kapittelfestivalen aukar med 0,1 millionar til 0,63 millionar kroner, og Tou Scene aukar med 0,1 millionar til 0,64 millionar kroner.

Auken i tilskotet til kulturinstitusjonane i Rogaland for 2009 ser slik ut:

	Tilskot 2008	Samla auke	Forslag 2009
Nytt konserthus i Stavanger		20 000	20 000
Tou Scene	541	100	641
Stavanger Symfoniorkester	45 898	7 301	53 199
Kammermusikkfestivalen i Stavanger	1 200	200	1 400
Haugesund Teater	6 162	1 000	7 162
Rogaland Teater	38 893	4 000	42 893
Kapittelfestivalen i Stavanger	526	100	626
Stavanger m./Rogaland kunstmuseum	10 871	2 479	13 350
Ryfylkemuseet	2 875	527	3 402
Rogaland kunstmuseum - skolesekkmidler	4 558	493	5 051
Jærmuseet - skolesekkmidler	8 802	1 089	9 891
Filmkraft Rogaland senter	1 000
Filmkraft Rogaland fond	2 000
Qvisten animation, internasjonalt tegnefilmforum i Stvgr.		500	500