Satsing på teater, museum og musikk i Rogaland

Regjeringa følgjer opp scenekunstmeldinga med ein auke til Haugesund Teater på 1,5 millionar kroner til 8,7 millionar kroner.

Rogaland Teater får ein auke på 4 millionar kroner til 46,9 millionar kroner for 2010. Auken skal mellom anna gå til barneteater. Tilskotet skal også gå til auka pensjonskostnader.

Tilskotet til Haugalandmusea aukar med 500 000 kroner, slik at tilskotet for 2010 blir nesten 3,3 millionar kroner. Jærmuseet vil få ein auke på 1,5 millionar kroner.

Kammermusikkfestivalen i Stavanger får ein auke på 250 000 til om lag 1,7 millionar kroner.

Stavanger Symfoniorkester vil få ein auke i tilskotet på 6,6 millionar kroner for å dekkje mellom anna auka lønskostnader i samband med at det er inngått nye avtaler i orkesteret med sikte på meir fleksibel drift og eit betre publikumstilbod. For 2010 er det foreslått eit tilskot på 59,8 millionar kroner.

Ramma for det statlege investeringstilskotet til nytt konserthus i Stavanger er på 250 millionar kroner. Av dette kjem ei løyving på 39 millionar kroner i 2010. Konserthuset vil ha lokale for mellom anna Stavanger Symfoniorkester. Bygginga har starta opp og skal vere ferdig i løpet av 2011. Etter planen skal opningskonserten haldast i april 2012.

Den totale løyvinga over KKDs budsjett til Rogaland i 2010 er på om lag 160 millionar kroner.

Tiltak                     Alle beløp i 1000-kroner	Vedtak 2009	Endring	Forslag 2010
Haugalandmusea	2 784	500	3 284
Haugesund Teater AS	7 162	1 500	8 662
Jærmuseet	10 891	1 500	12 391
Kammermusikkfestivalen i Stavanger (ICMF)	1 400	250	1 650
Rogaland Teater AS	42 893	4 000	46 893
Stavanger Museum/2009: Rogaland kunst.museum	13 642	738	14 380
Stavanger Symfoniorkester	53 199	6 616	59 815
Konserthus i Stavanger (investeringstilskot)	20 000		39 000