Tilsegn om 5 millionar kroner til Ullern kunstisbane

Kulturdepartementet har gitt tilsegn om eit tilskot på 5 millionar kroner til bygging av Ullern kunstisbane i Oslo.

Tilskotet er ei ekstraordinær støtte gjennom det anleggspolitiske programmet for 2007- 2010 til kostnadskrevjande anlegg. Midlane kjem i tillegg til 7,5 millionar kroner frå tiltakspakka for idrettsanlegg.

- Departementet vil gjerne bidra til etableringa av ei flott aktivitetsflate og å leggje til rette for at barn, ungdom og vaksne skal kunne utfalde seg i leik og konkurransar på isen. Når det i tillegg blir lagt kunstgras som dekke for fotball, vil dette bli eit kombinasjonsanlegg som kan brukast av idretten så godt som heile året, seier kulturminister Anniken Huitfeldt.

- Eg merkar meg med glede at også miljøspørsmålet er sentralt når det no skal byggjast ein kunstisbane til bruk for bandy- og skøyteaktivitet på Ullern kunstisbane, seier statsråden. Eit vellukka driftskonsept basert på varmepumpedrift blir venteleg ein god modell også for andre kunstisbanar, seier Huitfeldt.