Fylkeskommunane er ein viktig støttespelar for kommunane
Historisk arkiv
Publisert under: Regjeringen Stoltenberg II
Utgjevar: Kommunal- og regionaldepartementet
Nyheit | Dato: 23.03.2010
- God samhandling med kommunane blir ei av dei viktigaste oppgåvene til fylkeskommunane i åra som kjem, sa kommunal- og regionalministeren ho tysdag 23.03 opna den årlege kontaktkonferansen regjeringa arrangerte saman med fylkeskommunane.
- God samhandling med kommunane blir ei av dei viktigaste oppgåvene til fylkeskommunane i åra som kjem. Det sa kommunal- og regionalminister Liv Signe Navarsete då ho tysdag 23.03 opna den årlege kontaktkonferansen regjeringa arrangerte saman med fylkeskommunane.
- Gjennom forvaltningsreforma har fylka fått fleire oppgåver som krev god samhandling med kommunane, sa Navarsete ved innleiinga til den to dagar lange konferansen i Drammen.
Rettleie og samordne
Ho trakk mellom anna fram at ny plan- og bygningslov har styrkja den rolla fylkeskommunane har som rettleiar og samordnar for kommuneplanlegging.
- Samferdsel og riksvegar rører ved kommunane. Også dei nye regionale forskingsfonda og ansvaret for Innovasjon Noreg kjem kommunane til gode. Alt dette gjer fylkeskommunane til sentrale støttespelarar for kommunane i arbeidet med å byggje attraktive lokalsamfunn, sa statsråden.
Ho oppfordra også fylkeskommunane til å bli ein sterkare pådrivar for betre samarbeid mellom kommunar.
Samarbeid meir
- Me har mange kommunar. Det lokale folkestyret står sterkt. Men me treng stadig meir kunnskap og spesialkompetanse. Små kommunar må difor samarbeide meir og dele ansvar og oppgåver. Det er til beste for innbyggjarane og for næringslivet. Her kan fylkeskommunen vere ein støttespelar og pådrivar for gode løysningar, sa Navarsete.
Ho minna også om at forvaltningsreforma, som blei sett i verk frå årsskiftet, er ei demokratireform.
- Dei folkevalde får meir makt og ansvar. Fylkeskommunen blir ein meir interessant samarbeidspartnar for kommunar, næringsliv, FoU-miljø og staten. Med auka ansvar kjem nye utfordringar. Ny kompetanse og meir kunnskap må til. Organisasjonane må endre og tilpasse seg, sa Navarsete.
Mange tema
Tema på kontaktkonferansen vil variere frå transport og samferdsel til vidaregåande opplæring, landbruks- og matpolitikk, miljø og planlegging, kultur og regional utvikling.
- Dette er politikkområde som verkar inn i kvardagen til den enkelte innbyggjar, men som også handlar om dei store utviklingstrekka i samfunnet. Programmet for konferansen speglar såleis forvaltningsreforma. Trongen for samhandling mellom regjeringa og fylkeskommunane går som ein raud tråd gjennom desse to dagane, sa Navarsete.
