Kommunal- og regionaldepartementet løyver 300.000 kroner til pilotprosjektet Aurland natur- og kulturpark som ledd i regjeringa si styrka satsing i små samfunn. Regjeringa er innstilt på å støtta prosjektet også i 2007 dersom den lokale innsatsen som finst i dag held fram.

Prosjektet Aurland natur- og kulturpark handlar om å utvikla møteplassar og nettverk for utvikling av produkt som har utgangspunkt i dei rike natur- og kulturverdiane i Aurland. Lokalsamfunnet skal involverast i utvikling av strategiar og tiltak for å skapa lokalt produktmangfald.

- Eg er imponert over det grundige og konstruktive arbeidet Aurland natur- - og kulturpark har lagt ned sitt forprosjekt, seier kommunal- og regionalminister Åslaug Haga. Private og offentlege aktørar i Aurland viser gjennom dette initiativet vilje til vekst og utvikling i den nybakte verdsarvkommunen med fleire verna naturområde. Det er gledeleg å sjå at lokalsamfunnet tek konstruktivt tak i dei potensial som finst innanfor rammene av vern, seier Åslaug Haga.

Prosjektet passar svært godt inn i regjeringa si spesielle satsing på norske fjellområde som vart varsla i stortingsmelding 21 om distrikts- og regionalpolitikken, Med hjarte for heile landet.