Kommunal- og regionaldepartementet støtter "Lårdal Liv Laga"

Tokke kommune får 700.000 kroner til eit pilotprosjekt i Lårdal med hovudmål å  auke folketalet.

- Vår støtte til pilotprosjektet i Tokke er eit verkemiddel i distrikts- og regionalpolitikken. Prosjektet skal bidra til positiv tettstadsutvikling, arbeidsplassar og trivsel, seier kommunal- og regionalminister Åslaug Haga.

Tokke kommune og Lårdal Vel har gjennom prosjektet ”Lårdal Liv Laga” tatt utfordringa om å stoppe nedgang i befolkninga i kommunen med å starta opp eit treårig småsamfunnsprosjekt. Hovudmålet med prosjektet er å auka folketalet gjennom å utvikla gode bu- og nærmiljø tiltak å skape trivnad for innbyggarane.

Planen er å utvikle Lårdal til ein enno betre tettstad der butikkar vert halde opne og tenestetilbod vert styrka. Turismen skal aukast, og i tettstaden vil ein vidareutvikle god arkitektur og fysiske omgjevnader, styrke og bygge gode møteplassar og skape nye arbeidsplassar. I tillegg skal natur og opplevingar styrkast i reisemålssamanheng. I arbeidet vil det og være viktig å trekka med seg både landbruk, reiseliv, kultur og næringsliv. 

Som ein viktig del av arbeidet inngår mellom anna samarbeidet med Lårdal ungdomshus, som skal hjelpe fleire unge i området til å skape aktivitet og bulyst. Vassfronten med friområde, badeplass og båthamn for fritidsbåtar og kanalbåtar skal bli oppgradert. Det skal utviklast turvegar med utfordrande sti langs fjellkanten – ”tøffare enn Besseggen” og det skal gjennomførast omfattande kulturlandskapspleie for å gjera landskapet meir tilgjengeleg for turfolket.

Kommunal- og regionaldepartementet har i 2007 sett av inntil 50 millionar til Småsamfunnsprosjekt rundt om i landet. Målet er å få norske tettstader til å bli meir attraktive enn i dag, spesielt for de unge.

- Utviklingsarbeid i småsamfunn dreier seg i hovudsak om å gjera lokalsamfunna betre for alle innbyggarar, tilflyttarar og bedrifter. Vi ønskjer å fremja næringsutvikling basert på lokale ressursar, og sikre tilbod av offentlege og private tenester. Vi vil styrke trua og optimismen i disse samfunna, dette betyr mykje for folk, uansett kvar i landet ein bur, seier statsråd Haga.

 

Kommunal- og regionaldepartementets pressetelefon: 22 24 25 00