Narvik kommune vald ut som Grøn energikommune

Kommunal- og regionalminister Åslaug Haga lanserar Narvik kommune som Grøn energikommune. – Narvik skil seg ut som ein kommune med kompetanse på både vannkraft, solkraft og vindkraft, seier Haga.

Kommunane som veljast ut som Grøne energikommunar skal satse på energieffektivisering, alternativ fornybar energi og å få ned klimagassutsleppa i sin kommune.

- Narvik har fleire aktørar som viser store ambisjonar på klimaområdet. Teknologi-byen Narvik har mellom anna solcellefabrikk og solid kompetanse på energi gjennom private aktørar, Norut Teknologi og Høgskolen, seier Haga.

- Eg vil utfordre kommunen til å dra nytte av den kompetansen og dei ressursane som finst hos dei andre, seier Åslaug Haga som har store forventningar til dei grøne energikommunane.

Statsråden er spent på utviklinga i Narvik kommune og dei andre Grøne energikommunane.

- Utnevninga forpliktar Narvik til å arbeide for eit betre miljø og mindre klimautslipp. Mi gåve til kommunane i anledning Verdas Miljødag var klimakurs til alle. På kursa vil kommunane mellom anna lære meir om korleis dei lagar energi- og miljøplanar. Eg oppfordrar alle norske kommunar til ein klimadugnad, og dei Grøne energikommunane skal vere gode eksemplar for dei andre, seier Haga.

Narvik vil inngå i nettverk saman med Bardu, Målselv, Lenvik og Sørreisa kommunar.

Om Grøne energikommunar:
Onsdag 2. mai underteikna regjeringa og KS ei samarbeidsavtale om "Grøne energikommunar", for å satse på energieffektivisering, alternativ fornybar energi, som bioenergi og å få ned klimagassutsleppa i kommune-Noreg. Kommunane som blir vald ut, vil samarbeide i nettverk, og KRD vil bidra med midlar til klima- og energipådrivarar i dei enkelte nettverka.

Kommunal- og regionaldepartementets pressetelefon: 22 24 25 00