Kommunal- og regionalministeren vitjar Vadsø

Statsråd Magnhild Meltveit Kleppa vil måndag 14. april vitja Finnmark for å diskutera vediskapingsspørsmål knytte til regjeringa sin Nordområdestrategi. Ho vil også besøka fleire kvinnelege etablerarar.

- Nordområdepolitikk er nasjonal politikk. Eg er svært oppteken av at vi i fellesskap tek grep om verdiskaping på land i nord, seier statsråd Kleppa.

Målet med besøket er å diskutera korleis regionale og nasjonale aktørar i samarbeid kan auka den landbaserte verdiskapinga i Nordområda.

Fokus er auka landbasert verdiskaping som gjev langsiktige effektar på den økonomiske utviklinga i landsdelen. Kommunal- og regionaldepartementet konsentrerer seg om fire overordna tiltak for auka landbasert verdiskaping: næringsutvikling, fysisk infrastruktur, kunnskapsproduksjon og Aust-Vest samarbeid. Særleg er samarbeidet med Russland viktig.

KRD legg vekt på at distrikts- og regionalpolitiske midlar til regional utvikling stør opp under Nordområdestrategien gjennom styrkt og spissa nærings- og innovasjonsretta arbeid i landsdelen. Spesielt gjeld dette innan olje og gass knytt til klimatilpassa teknologiar, i tillegg til ein felles marknadsoverbygging for reiselivet i landsdelen.

- Vi treng viktige nasjonale fyrtårnsprosjekt som til dømes ”Klimatilpassa teknologiar og reiseliv”. Eg ynskjer òg innspel frå landsdelen på korleis deira eigne kunnskapsinstitusjonar i fellesskap kan styrkja innsatsen på område der dei har særlege fortrinn. På reiselivssida er landsdelen godt i gang med arbeidet, seier Kommunal- og regionalminister Kleppa.

• Program (pdf)
• Kommunal- og regionalministeren vitjar Barentssekretariatet (pressemelding 11.04.08).