250 000 kroner til landbruksfornying i Gloppen

Kommunal- og regionalminister Magnhild Meltveit Kleppa løyver ytterlegare 250.000 kroner til pilotprosjektet Agro Business Park i Gloppen. Det skjer som ledd i den nasjonale småsamfunnssatsinga.

- Det er gledeleg å sjå at private og offentlege aktørar går saman om å utvikla kompetanse for å gje landbruket fleire bein å stå på. Eg meiner Agro Business Park er av stor verdi langt utover Nordfjord. Andre landbruksområde har mykje å læra her, seier kommunal- og regionalminister Magnhild Meltveit Kleppa.

Midlane er ei oppfølging av støtte gitt i 2006, 2007 og 2008. Til saman er det no løyvd 2,6 millionar kroner til prosjektet i Gloppen. Føremålet med Agro Business Park er å utvikla eit regionalt kompetansesenter for landbruket gjennom Sandane Næringshage. Ulike verksemder vert knytt saman for å få fagleg tyngde og kunna arbeida aktivt for nyskaping og utvikling i landbruket.

Tanken er å skapa fleire inntektskjelder i landbruket, gjennom tilleggsnæringar. Særleg vert det arbeida med å skapa marknad for bioenergi og å informera om kva som er mogleg. Opplevingsturisme, satsing på frukt og bær er andre satsingsområde. I tillegg kjem satsing på ”Inn på tunet”, tenestetilbod til oppvekst, skule og helse- og sosialsektor.

Kommunal- og regionaldepartementet sin pressetelefon: 22 24 25 00.