Fleire kommunar med vekst i folketalet

Tal frå SSB syner at 30 fleire kommunar hadde vekst i folketalet dei ni fyrste månadene i 2009 samanlikna med same periode i 2008. Av landets 430 kommunar hadde 293 (68 prosent) vekst i folketalet dei ni fyrste månadene. Blant dei 177 minst sentrale kommunane i landet var det ei auke frå 60 til 81 kommunar som hadde vekst i folketalet i perioden. Samla sett var det ei auke i folketalet i alle strøk av landet.

- Det er svært gledeleg at trenden med at fleire utkantkommunar har vekst i folketalet held fram, seier Kommunal- og regionalminister Liv Signe Navarsete. Det er regjeringa sitt distriktspolitiske løft som vi trur vi ser resultata av. Gjeninnføringa av differensiert arbeidsgjevaravgift, styrka kommuneøkonomi og betra samferdsletilbod har betydd enormt mykje, seier Navarsete.

Talet på kommunar med vekst i folketalet dei ni første månadene er det høgste sia 1998. Det er også fyrste gong i perioden at dei perifere strøka av landet samla hadde ei reell auke i folketalet. Denne endringa ser ut til å skuldast ei auka tilflytting til tettstadregionar i form av innvandring. Samtidig er  den innanlandske fråflyttinga frå periferien mindre enn det den har vore dei seinare åra.

- Sjølv om trendane nå er positive mange stader i landet er det behov for ein langsiktig og kraftfull innsats for at folk skal få ein reell valfridom til å busetje seg der dei vil, seier Navarsete.

Kommunal- og regionaldepartementet sin pressetelefon: 22 24 25 00.