Bulystmidlar til prosjektet ”PreForm” i Fjaler

35 prosjekt i heile landet får 32 millionar kroner til å arbeide med bulyst. - Det har vore eit krevjande arbeid å plukke ut dei beste av heile 260 søknader, seier kommunal- og regionalminister Liv Signe Navarsete.

Regjeringa vil at alle i Noreg skal ha høve til å bu der dei ønskjer. Den nye Bulyst-satsinga skal utvikle endå meir attraktive lokalsamfunn over heile landet.

- Søknadsbunken vitnar om at det er eit stort engasjement i heile landet, seier kommunal- og regionalministeren. Det kom inn søknader for i overkant av 200 millionar kroner. Tema som omdømme, kulturbasert stad- og næringsutvikling samt prosjekt for å skaffe bustader går att i mange søknader. Andre tema er tenester, arbeid og medverknad.

I utveljinga av Bulyst-prosjekt har Kommunal- og regionaldepartementet særleg lagt særleg vekt på kvalitet, forankring, nytenking og samarbeid. Viktige målgrupper er ungdom, kvinner og innvandrarar. Også fylkeskommunane har spelt ei viktig rolle i handsaminga av søknader.

Pre Form
Fjaler kommune får 200.000 kroner til forprosjektet Pre Form. Prosjektet skal sjå på potensialet for vidare utvikling av kulturnæringa i Fjaler. Arbeidet tar utgangspunkt i at Fjaler har ei langvarig satsing på internasjonal kunst og kultur. Kommunen ynskjer å skape eit nettverk og miljø for å gjere Fjaler til ein attraktiv stad for dei som ynskjer å ha kunst- og kulturproduksjon som leveveg.

Sogn og Fjordane fylkeskommune påpeikar at prosjektet vil medverke til utvikling av lokalsamfunnet og styrke omdømmet til Fjaler som ein innovativ og nytenkjande kulturkommune.

Sogn og Fjordane fylkeskommune trekkjer fram at prosjektet legg til rette for ei nyskapande buform med overføringsverdi.

Fem år med spanande prosjekt i distrikta
- Regjeringa har arbeidd med ulike prosjekt for å skape attraktive lokalsamfunn og bulyst sidan me lanserte Distriktsløftet i 2005. Me har lært kort viktig det er at utviklingsarbeidet er godt forankra, og at fleire aktørar samarbeider. Dette legg me stor vekt på i Bulyst-satsinga, seier Navarsete.

Kommunal- og regionaldepartementet sin pressetelefon: 22 24 25 00.