Finnmark får 70 millionar til samhandling

Kommunane i Finnmark fylke får 70 millionar kroner til kommunal medfinansiering av spesialisthelsetenesta og utskrivingsklare pasientar neste år.

I samband med samhandlingsreforma får kommunane overført om lag 5 milliardar kroner over rammetilskotet i 2012. Dette er fordi kommunane får nye oppgåver ved innføring av kommunal medfinansiering av spesialisthelsetenesta og økonomisk ansvar for utskrivingsklare pasientar.

- Nye oppgåver skal kommunane få kompensasjon for. Desse oppgåvene får kommunane handlingsrom til å løyse sjølve eller saman med andre kommunar og i samarbeid med spesialisthelsetenesta, seier kommunal- og regionalminister Liv Signe Navarsete.

Betre folkehelse og betre helsetilbod til innbyggjarane nær der dei bur er målet med samhandlingsreforma.

- Det vil lønne seg for kommunane å halde folk friske. Vi skal bli betre på førebygging og flinkare til å tilby det som skal til i forkant i staden for å reparere i etterkant, seier Navarsete.

Midlane vert fordelte gjennom inntektssystemet til kommunane. Fordelinga baserar seg på alderssamansettinga i befolkninga og tek omsyn til at behandlingskostnadene er aukande med alder.   

Enkelte kommunar vil kunne ha høgare kostnader ved kommunal medfinansiering og utskrivingsklare pasientar ved innføringstidspunktet enn det som fordelinga i inntektssystemet fangar opp. Desse vil i ein overgangsperiode få ein kompensasjon utover det som vert fordelt gjennom kostnadsnøkkelen. Regjeringa vil i statsbudsjettet kome tilbake til nivå og retning på kompensasjonen.

Tabellen under viser ei berekning på kor mykje kommunane i Finnmark fylke vil få gjennom kostnadsnøkkelen i inntektssystemet. Dei endelege tala vil avvike noko frå anslaget sidan endelege rammer vert fastsett i statsbudsjettet og kriteriedata om befolkningsutviklinga i kommunane er oppdaterte.

Fordeling av samhandlingsmidlar	Beløp i 1000 kr
2002 Vardø	2 427
2003 Vadsø	5 611
2004 Hammerfest	8 959
2011 Kautokeino	2 627
2012 Alta	15 938
2014 Loppa	1 358
2015 Hasvik	1 069
2017 Kvalsund	1 259
2018 Måsøy	1 478
2019 Nordkapp	3 327
2020 Porsanger	4 052
2021 Karasjok	2 685
2022 Lebesby	1 435
2023 Gamvik	1 115
2024 Berlevåg	1 196
2025 Tana	3 109
2027 Nesseby	1 090
2028 Båtsfjord	2 006
2030 Sør-Varanger	9 502
Finnmark	70 242

• Kommuneproposisjonen 2012 
  Prop. 115 S (2010-2011)

Kommunal- og regionaldepartementet sin pressetelefon: 22 24 25 00.